ENERO 24, 2022
RUSSIA

Naeksperiensiahan Nanday Brother Aleksandr Polozov kag Brother Stepan Shevelev ang Madamo nga mga Pagpakamaayo Bisan Ginahingabot Sila

I-PLAY

Sa indi madugay, ipahibalo sang Norilsk City Court of the Krasnoyarsk Territory ang desisyon sini sa kaso nanday Brother Aleksandr Polozov kag Brother Stepan Shevelev. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Oktubre 20, 2019

Ginpalibutan sang mga special forces ang campsite sa siudad sang Norilsk. Sobra sa 50 ka Saksi ang gin-detain
Oktubre 26, 2019

Gin-aresto kag ginbutang sa pretrial detention si Aleksandr
Enero 21, 2020

Ginpagua si Aleksandr pagkatapos gin-detain sang halos tatlo ka bulan
Pebrero 19, 2020

Ginlakip sa listahan sang mga extremist si Aleksandr kag indi na niya makuha ang iya kuarta sa banko
Mayo 6, 2021

Gin-akusar si Stepan nga “sekreto nga nagplano sa paghimo sing kriminal nga mga buluhaton” upod kay Aleksandr. Nalakip sa “mga krimen” kuno ni Stepan amo ang pagpangamuyo kag pagbantala

Impormasyon Parte sa Ila

Aleksandr Polozov

Natawo: 1970 (Torzhok, Tver Region)

Biograpiya: Sang lamharon sia, mahilig sia sa hockey kag swimming. Nakaobra sia sa emergency rescue service. Napangasawa niya si Svetlana sang 1998. Nanamian sila magbisikleta kag magbiyahe

Nagtuon sia sing Biblia upod sa mga Saksi ni Jehova sang dekada ’90. Nabawtismuhan sia sang 1995

Ang Iya Ginsiling

Paano ka ginbuligan ni Jehova sang ara ka sa detention center?

Pagkatapos sang una nga pag-interogar sa akon, gindala ako sa selda. . . . Ginpamangkot ako sang akon upod nga priso kon ngaa napriso ako. Ginpaathag ko nga gin-akusar ako bangod sang akon pagtuo sa Dios. . . . Sia nagsiling: “Tan-awa ang idalom sang lamesa.” Pagtan-aw ko may talaguan ini sa idalom, kag may duha ini ka Biblia. Daw indi ako makapati! . . . Sa una ko pa lang nga adlaw, may kopya na ako sang Pulong sang Dios. Nagapasalamat gid ako kay Jehova nga ginsuportahan niya ako sa sining tumalagsahon nga paagi.

Paano ka nakabenepisyo sa suporta sang mga kauturan?

Nagpalig-on gid kag nakabulig sa akon ang pagsuporta sang mga kauturan. Isa ka aga nga matugnaw gid ang tiempo, may mga kauturan nga nagkadto kag namalakpak sila samtang ginapasakay ako halin sa detention center pakadto sa korte. Pagka-alas 6:00 sang hapon, namalakpak sila liwat sang ginpasakay naman ako pabalik sa detention center. Nagpahalipay gid ini sa akon, kag daku gid ini nga panaksi.

Stepan Shevelev

Natawo: 1982 (Maslyanino, Novosibirsk Region)

Biograpiya: Nagaobra sia bilang cable splicer. Napangasawa niya si Oksana sang 2013. Nanamian sila magbasa kag magbiyahe

Sang 1996, nagsugod sa pagtuon sa Biblia ang iloy kag utod nga babayi ni Stepan. Bisan pa wala sa ila ang nag-Saksi, nagsugod sa pagtuon si Stepan kag nagdayaw sia sa mga panudlo sang mga Saksi ni Jehova. Napalig-on sia sang natun-an niya kon paano ang Biblia nagbulig para mangin maayo ang pagkabuhi sang mga tawo. Nabawtismuhan sia sang 2001

Ang Iya Ginsiling

Paano nakabulig sa inyo nga mag-asawa ang regular nga pagtuon sa Biblia kag pagsimba?

Nanamian gid kami sa pangpamilya nga pagsimba. Madamo na nga tuig ang nagligad, may adlaw kami nga gin-schedule para sa pagtuon, kag wala gid namon ginatugutan nga indi ini madayon. Amo nga may pagsalig ako nga mangin mabakod gid ang pagtuo sang akon pinalangga nga asawa. Dugang pa, ginahimo ko nga makalilipay ang akon pagbasa sang Biblia kada adlaw. Halimbawa, sa isa ka tuig gindiretso ko lang basa ang bilog nga Biblia. Sa sunod nga tuig, ginabasa ko ini suno sa pasunod nga mga hitabo. Tapos, ginagrupo ko ang mga libro suno sa manunulat, kag iban pa. Paagi sa sini, indi makatalaka ang pagbasa ko sang Biblia, kag may bag-o naman ako nga natun-an sa pamilyar nga mga teksto.

Paano nagbag-o ang imo pagtamod sa mga nagahingabot sa imo?

Ginbuligan ako ni Jehova nga tamdon sila suno sa iya pagtamod. Nahangpan namon sang akon asawa nga sa masami ordinaryo lang sila nga mga tawo nga nagahimo lang sang ila obra. May mga problema man sila kag dapat man sila sugiran sang paglaum nga aton ginabantala.

Nagasalig kita nga padayon nga suportahan ni Jehova ang aton pinalangga nga mga kauturan nga matutom nga ‘nagalagas sing padayon’ sa pagkamatarong bisan sang paghingabot.—Hukom 8:4.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE