HUNYO 21, 2021
RUSSIA
Nagasalig Gid si Sister Tatyana Sholner kay Jehova kag Malipayon Gihapon Bisan Pa Ginahingabot Sia
UPDATE | Gin-deny sang Korte sa Russia ang Pag-apelar
Sang Disiembre 16, 2021, gin-deny sang Court of the Jewish Autonomous Region ang pag-apelar ni Sister Tatyana Sholner. Indi niya kinahanglan nga mapriso sa sini nga tion.
Sang Hunyo 25, 2021, nagdesisyon ang Birobidzhan District Court of the Jewish Autonomous Region nga guilty si Tatyana Sholner kag ginsentensiahan sia sang 30 ka bulan nga suspended prison.
Impormasyon Parte sa Iya
Tatyana Sholner
Natawo: 1993 (Birobidzhan)
Biograpiya: Napatay ang iya amay sang bata pa sia. Bangod sini, sia kag ang iya utod nga lalaki ginpadaku sang ila iloy. Nagtrabaho sia sa isa ka botika. Nanamian sia mag-ice skating, mag-bike, kag mag-volleyball
Nangin interesado sia sa Biblia sang nag-eskwela sia sing pagpanahi sa isa ka technical college. Nagdayaw gid sia sa iya klasmeyt nga isa ka Saksi ni Jehova. Naumpawan gid sia sang paglaum parte sa pagkabanhaw sang napatay ang iya 12 anyos nga pakaisa sang 2014. Nabawtismuhan sia sang 2017
Ang Iya Kaso
Sang Pebrero 6, 2020, ginkasuhan sang mga awtoridad sang Russia sa Birobidzhan ang anom ka Cristiano nga sister, lakip ang 27 anyos nga si Tatyana. Ginkasuhan sila sing “extremism” bangod lang kay ginahimo nila ang mga hilikuton sang ila relihion. Sa kabug-usan, 19 tanan ka kaso ang ginpasaka sa mga Saksi ni Jehova sa Jewish Autonomous Region.
Kumbinsido gid si Tatyana nga ginabuligan sia ni Jehova nga mabatas ini nga pagtilaw. Nagsiling sia: “Sugod sang ginhingabot ako, indi ko na masimba si Jehova pareho sa ginahimo ko sadto. Bisan pa sini, wala ko gid ginakalimtan nga basahon ang Biblia. Ginasugid ko kay Jehova ang tanan ko nga ginabatyag kag ginakabalak-an. Nagapangamuyo ako sang iya balaan nga espiritu para makabatas ako kag padayon nga mangin matutom sa iya. Ginapangamuyo ko man nga buligan niya ako nga mangin maisog kag hatagan ako sing kaalam para mapangapinan ko sing maayo ang ngalan sang Dios sa korte.”
Nagsiling pa sia: “Kabalo ko nga ginasuportahan, ginabuligan, kag ginaproteksionan ni Jehova ang iya mga alagad. Amo ini ang nakabulig sa akon nga mangin malipayon gihapon. Nabatyagan ko nga ginauyatan ako ni Jehova sang iya mabakod nga tuo nga kamot. Nakabulig ini sa akon nga magsalig pa gid sa iya kag mangin kalmado lang bisan pa ginahingabot ako.”—Isaias 41:10.
Samtang ginahulat naton ang desisyon sang korte, nagasalig kita nga sa bulig ni Jehova padayon nga mabatas ni Tatyana ang kabudlayan.—Roma 12:12.
Basi Manamian Ka Man
NEWS RELEASE
Ara sa Prisuhan Bangod sa Ila Pagtuo—Russia
Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.