Duha ka miembro sang House of Representatives sa United States, nga bahin sang gobierno nga nagahimo sang mga layi, ang naghimo sang House Resolution 958 nga nagakondenar sa Russia bangod sang indi makatarunganon nga pagpriso sini sa aton utod nga si Dennis Christensen. Ini nga resolusyon amo ang pinakaulihi nga legal nga dokumento nga ginhimo sang mga opisyal sang gobierno nga nagakondenar sa paghingabot sang Russia sa aton mga kauturan bangod sang ila relihioso nga mga pagpati.

Si Brother Christensen gin-aresto kag ginpriso sang Mayo 2017 bangod lamang sa iya pagpakigbahin sa Cristianong mga miting sang mga Saksi ni Jehova. Ang resolusyon, nga ginhimo nanday Representative Eliot L. Engel kag Representative Michael T. McCaul sang Mayo 8, 2020, nagamando sa gobierno sang Russia nga buy-an gilayon si Brother Christensen.

“Si Dennis Christensen, nga isa sa mga Saksi ni Jehova kag citizen sang Denmark, ginsentensiahan nga mapriso sing anom ka tuig sang Pebrero 6, 2019, sa isa ka desisyon nga ginkondenar sang United States Commission on International Religious Freedom,” siling sang resolusyon, “kay dugang ini nga ebidensia nga ginalapas sang gobierno sang Russia ang kahilwayan sa relihion ukon ginapasugtan ang paglapas sini nga kahilwayan.”

Sa Mayo 25, 2020, ma-tatlo na ka tuig sa prisuhan si Brother Christensen. Isa sia sa 32 naton ka kauturan nga ginpriso sa Russia, diin 9 ang ginpamatbatan nga guilty kag 23 ang ginpriso bisan wala pa mabista. May 18 pa gid ka kauturan nga gin-house arrest. Halin sang 2017, halos 900 na ka balay sang aton mga kauturan ang gin-raid sa Russia. Bangod sini, 331 ka Saksi ni Jehova ang ginpasakaan sang mga kaso kriminal.

Ginakondenar gid sang mga opisyal sa United States kag Europe ang Russia bangod sang paghingabot sini sa mga Saksi ni Jehova.

Bisan maaprobahan man ang House Resolution 958 ukon indi, kag bisan ano man ang resulta sini, kabalo kita nga padayon nga buligan ni Jehova ang aton mga kauturan sa Russia nga makabatas nga may kalipay. Ginahulat naton ang pag-abot sang tion nga dulaon ni Jehova ang tanan nga ‘nagapahito sing kagamo paagi sa kasuguan.’—Salmo 94:20-23.