Sang Agosto 14, 2019, ang appeal court sa siudad sang Kirov nagmando nga untaton na ang pag-house arrest sa 26 anyos nga si Brother Andrey Suvorkov. Bisan pa ginhatagan sing dugang nga kahilwayan si Brother Suvorkov, nagapadayon gihapon ang kaso kriminal batok sa iya.

Suno sa nareport na sang nagligad, si Brother Suvorkov gin-aresto, upod sa iya stepfather kag tatlo ka iban pa nga brother, sang ginhalughog mga pulis kag mga soldado sang militar nga may tabon ang nawong ang 19 ka balay sa Kirov sang Oktubre 9, 2018.

Sang gindumdom niya ang tion nga ginhalughog ang iya balay, si Brother Suvorkov nagsiling: “Madamo sa amon pagkabutang ang ginkompiskar. Pero wala namon ini ginkanugunan sang akon asawa, kay ginapanikasugan gid namon nga pasimplehon ang amon kabuhi kag wala namon ginahatagan sing sobra nga importansia ang materyal nga mga butang. Ang laygay sa Mateo 6:21, nga ‘kon diin ang inyo bahandi, didto man ang inyo tagipusuon,’ nakabulig sa amon nga magpabilin nga kalmado.”

Sa tapos sang pagpanghalughog, ginpasakaan sing mga kaso kriminal si Brother Suvorkov, ang iya stepfather, kag ang tatlo ka iban pa nga brother, bangod sa pagkanta sang mga ambahanon sang Ginharian, pagtuon sang mga literatura parte sa relihion, kag pagpanag-iya sang isa ka kopya sang Russian nga translation sang Bag-ong Kalibutan nga Badbad sang Balaan nga Kasulatan. Ginbutang sila sa temporaryo nga prisuhan samtang nagahulat sa desisyon sang korte kon bala hilwayon sila ukon prisuhon bisan wala pa mabista.

Ginlaragway ni Brother Suvorkov ang iya eksperiensia: “Duha ka gab-i ako sa temporaryo nga prisuhan. Sang primero, wala gid untat ang akon pagpangamuyo. Sigurado ako nga nabatian ako ni Jehova kag indi niya ako pagpabay-an. Gindumdom ko ang mga kanta halin sa ambahanon sang Ginharian kag ginkanta ko ini. Sang ulihi, mga 50 ka kanta ang nakanta ko.”

Ang korte nagdesisyon nga prisuhon si Brother Suvorkov kag ang iban pa bisan wala pa sila mabista. Sa iya una nga semana sa prisuhan, nagpokus si Brother Suvorkov sa pagbulig sa iban. Sia nagsiling: “Nagdesisyon ako nga sambiton ang ngalan sang mga kauturan sa akon pangamuyo kag maghimo sing makapalig-on nga mga sulat sa mga tawo nga madumduman ko ang adres. Nagpahalipay gid ini sa akon.”—Binuhatan 20:35.

Pagligad sang mga binulan, ining tanan nga brother gin-house arrest na lang, luwas kay Brother Andrzej Oniszczuk. Si Brother Suvorkov ang una sa mga brother sa Kirov nga gin-untat ang pag-house arrest.

“Kon balikan ko ang natabo,” siling ni Brother Suvorkov, “Nalipay gid ako nga naeksperiensiahan ko nga mapriso. . . . Wala ko kabalo sang matabo sa palaabuton ukon kon bala mapriso pa ako liwat. Subong may kompiansa na ako nga suportahan ako ni Jehova kag sang iya organisasyon, bisan pa ara ako sa prisuhan. Wala na ako mahadlok nga mapriso.”