Sang Oktubre 18, 2019, ginpagua sa prisuhan si Brother Dmitriy Barmakin pagkatapos sang 447 ka adlaw nga pagkapriso bisan wala pa sia nabista. Subong, naka-house arrest sia, kag nakaupod na niya liwat ang iya asawa nga si Elena nga ginpakaslan niya 13 ka tuig ang nagligad.

Gin-aresto si Brother Barmakin sang Hulyo 28, 2018, sang pilit nga ginsulod sang armado nga mga pulis, nga may tabon ang mga guya, ang puluy-an sang iya 90 anyos nga ugangan nga iya ginbisitahan sa sina nga tion. Gin-akusar si Brother Barmakin nga nagapakigbahin sa relihioso nga hilikuton sang mga Saksi ni Jehova. Ang Pervorechenskiy District Court sang Vladivostok nagmando nga prisuhon si Dmitriy Barmakin sing duha ka bulan bisan wala pa nabista. Pagkatapos sini, walo ka beses pa nga ginpalawig sang korte ang pagpriso sa iya.

Sa isa sa mga hearing sa iya, ang korte nagsiling nga ang mahidaiton nga pagsimba ni Brother Barmakin isa ka “krimen batok sa kahim-ong kag seguridad sang estado nga napasad sa konstitusyon.” Ining sayop nga panumbungon baliskad gid sa maathag nga ginasiling sang Article 28 sang Konstitusyon sang Russian Federation nga ang tanan “hilway nga makapili, makatigayon, kag makasugid sang ila relihioso kag iban pa nga ginapatihan kag makahimo sang mga hilikuton may kaangtanan sa sini.”

Bisan pa padayon gihapon ang kriminal nga imbestigasyon batok kay Brother Barmakin, nalipay kita nga ginpagua sia sa prisuhan ni Judge Stanislav Salnikov sang Pervorechenskiy District Court sang Vladivostok.

Nagasalig kita nga padayon nga palig-unon kag pabakuron ni Jehova ang aton mga kauturan sa Russia, ilabi na ang mga napriso kag na-house arrest. Ini nga mga kauturan, pareho ni Brother Barmakin, maayo gid nga halimbawa sang kaisog kag katutom sa aton bug-os kalibutan nga paghiliutod.—Filipos 1:13, 14.