Sang Mayo 20, 2021, nagdesisyon ang Leninskiy District Court of Saratov nga guilty si Brother Rustam Seidkuliev kag ginsentensiahan sia nga mapriso sing duha ka tuig kag tunga. Pagkatapos sang desisyon sa iya, gindala sia dayon sa prisuhan.

Rustam Seidkuliev

• Natawo: 1977 (Ashgabat, Turkmenistan)

• Biograpiya: Ang iya lang iloy ang nagpadaku sa iya. Nagtuon sia sing Biblia sa mga Saksi ni Jehova sang 1993. Pagligad sang duha ka tuig, nagtuon man ang iya iloy. Antes nabawtismuhan, duha ka beses sia nga ginpriso sa Turkmenistan kay nagpangindi sia nga magsoldado bangod sa iya konsiensia nga nahanas Biblia

  Ang praktikal nga mga laygay sa Biblia kag ang mga tagna sini nga nagakatuman amo ang nagkumbinsi sa iya nga magdedikar kag magpabawtismo sang 1998. Sang gin-deport ang iya stepfather kay isa ini sa mga Saksi ni Jehova, nagsaylo ang ila pamilya sa Russia sang tuig 2000

  Nagtrabaho sia bilang telephone technician kag construction worker. Sang 2001, nakilala niya si Yuliya nga napangasawa niya sang ulihi. Nanamian sila nga mag-asawa mag-bowling, magpiknik, kag mag-table tennis. Sugod sang Septiembre 2019, sila ang nagaatipan sa mga ginikanan ni Rustam

Sang Marso 2019, isa ka officer sang Federal Security Service (FSB) ang nagkadto sa balay ni Brother Rustam Seidkuliev kag sang iya asawa nga si Yuliya. Ginbalabagan sang officer sang iya salakyan ang ila driveway, kag pasunod sila nga gin-interogar kag ginhatagan sing summon nga magreport sa FSB office para sa dugang nga interogasyon.

Sang Pebrero 15, 2020, gin-aresto sang mga pulis sanday Rustam kag Yuliya sa isa ka shopping center. Ginpriso si Rustam. Sang ulihi, nagmando ang korte nga i-house arrest sia. Pero ginsaylo sia anay sa isa ka institusyon sa sulod sang duha ka bulan, kag indi sia puede mabisitahan sang iya asawa. Sang ara na sia sa ila balay, gindumilian sia gihapon nga maggamit sing Internet ukon sang bisan ano nga klase sang komunikasyon para maistorya ang iban nga tawo nga indi niya upod sa ila balay. Pito ka beses nga gin-extend ang pag-house arrest sa iya. Kon totalon, 217 ka adlaw nga gin-house arrest si Rustam.

Madamo sing naeksperiensiahan nga kabudlayan si Rustam sang gin-house arrest sia. May mga bes nga halin sa alas 9:00 asta sa alas 11:00 sang aga lang sia puede makalakatlakat sa gua. Pero kon kis-a, wala sia ginapasugtan nga maggua bisan magtinlo lang sang ila ugsaran ukon magkay-o sang nagatulo nila nga atop. Ginsugid niya ang iya ginhimo para indi sia maluyahan sing buot: “Bangod naka-house arrest ako, mas madamo ako sing tion nga magpangamuyo kag magpamalandong parte sa mga kamatuoran sa Biblia. Para mangin masako ako pirme, ginaplano ko ang akon mga himuon sa kada adlaw. Nakabulig ini sa akon nga indi ma-depress ukon masubuan. Bal-an ko nga may iban pa nga kauturan nga ginpriso man kag mas mabudlay pa gani ang ila sitwasyon sangsa akon.”

Nakabulig man kay Rustam ang iya mga inagihan. Nadumduman niya ang pagpriso sa iya sadto sa Turkmenistan. Nagsiling sia: “Madamo na nga beses nga ginbuligan ako ni Jehova sadto, ilabi na sang napriso ako sang pamatan-on pa ako. Ang akon mga eksperiensia sa prisuhan nakabulig sa akon nga magsalig kay Jehova kag mangin kalmado lang.”

Padayon nga ginahimo ni Rustam ang iya masarangan sa pag-alagad kay Jehova. Nagsiling sia: “Dapat gid kita mangin regular sa aton mga miting kag sa aton pagsimba kay Jehova. Kag bisan limitado na lang ang aton oras, gamiton gid naton ini sa pagbantala kag sa pagpalig-on sa aton mga kauturan. Determinado ako nga padayon nga mag-alagad kay Jehova asta sa masarangan ko kag bisan diin man niya ako ibutang, kay diutay na gid lang nga tion ang nabilin.”

Nagasalig kita nga padayon nga hatagan ni Jehova ang aton matutom nga mga kauturan sa Russia “sang tagsa ka maayong butang agod mahimo ang iya kabubut-on.”—Hebreo 13:21.