DISIEMBRE 27, 2023
RUSSIA

Nagpabilin nga Positibo ang mga Brother Bisan Pa Ginpriso kag Gin-house Arrest sa Malawig nga Tion

I-PLAY

Sa indi madugay, ipahibalo sang Oktyabrskiy District Court of Irkutsk ang desisyon sini sa kaso nanday Brother Nikolay Martynov, Brother Sergey Kosteyev, Brother Yaroslav Kalin, Brother Mikhail Moysh, Brother Igor Popov, Brother Denis Sarazhakov, Brother Aleksey Solnechniy, Brother Andrey Tolmachev, kag Brother Sergey Vasiliyev.

Impormasyon Parte sa Ila

Nikolay Martynov

Natawo: 1958 (Bandarka, Irkutsk Region)

Biograpiya: Nag-obra sia bilang drayber

Napangasawa niya si Irina sang 1982. May duha sila ka bata

Si Irina nagpa-Bible study upod sa mga Saksi ni Jehova sang 1997. Ang katumanan sa mga tagna sa Biblia ang nagpakumbinsi kay Nikolay sa kamatuoran. Nabawtismuhan sila nga duha sang 1998

Ang Ginsiling sang Asawa ni Nikolay nga si Irina a

Ano ang nakabulig sa imo bana nga magpabilin nga positibo bisan pa napriso sia sing sobra duha ka tuig samtang nagahulat sang iya hearing?

Ginabasa ni Nikolay kag ginapamalandungan ang Biblia sing regular, kag pirme niya ginasugid kon paano ginasabat ni Jehova ang iya mga pangamuyo. Pero mabudlay gid kay napahilayo sia sa amon. Maayo gid si Nikolay nga bana kag tatay. Mabudlay gid para sa iya nga indi na niya mahatag ang amon mga kinahanglan pareho sang ginahimo niya sang una. Pero, kon ginasugiran sia namon kon paano kami ginaatipan ni Jehova paagi sa mga kauturan, nagabatyag sia sang kalinong sa hunahuna. Nagsiling man sia nga ang isa nga nakabulig sa iya amo ang pag-imadyin nga updanay na kami sang amon bilog nga pamilya sa bag-o nga kalibutan. Naplano na niya sa iya pensar kon paano niya tukuron ang amon balay didto kag kon ano nga mga kahoy nga nagapamunga ang itanom niya didto.

Yaroslav Kalin

Natawo: 1969 (Pivovarikha, Irkutsk Region)

Biograpiya: Nagdaku sa pamilya nga Saksi ni Jehova. Ang iya ginikanan kag ang iya lolo kag lola gintapok sa Siberia sang 1951

Nag-obra sia bilang manugkay-o sang TV kag radyo

Nabawtismuhan sia bilang isa sa mga Saksi ni Jehova sang 1987

Napangasawa niya si Tatyana sang 1991. May duha sila ka bata nga lalaki kag duha ka bata nga babayi. Napatay ang ila agot nga lalaki sang 2007

Ang Ginsiling sang Asawa ni Yaroslav nga si Tatyana b

Ano nga mga kabudlayan ang ginaatubang sang imo bana sa pretrial detention, kag ano ang nakabulig sa iya?

Sobra duha ka tuig si Yaroslav sa bartolina, kag mabudlay gid ato para sa iya. Gusto niya gid makig-upod kag makig-istorya sa mga tawo. Gani, nabalaka sia, na-depress, kag nagluya sang ginbartolina sia. Pero, ginbatuan niya ang pagluya sang buot kag wala niya ginpamensar nga makaluluoy sia. Sa iya mga sulat, pirme niya ginalakip ang Colosas 1:11, nga nagasiling: “Kag kabay nga mapabakod kamo sang kusog halin sa iya mahimayaon nga gahom agod makabatas kamo sing bug-os nga may pagpailob kag kalipay.” Determinado gid sia nga mangin matutom kag magsalig kay Jehova. Kabalo ko nga kumbinsido si Yaroslav nga para pakamaayuhon sia dapat padayon niya nga himuon ang kabubut-on ni Jehova subong asta sa wala sing katapusan.

Mikhail Moysh

Natawo: 1987 (Ukraine)

Biograpiya: Nag-obra sia sa konstruksion kag sa pagbaligya

Napangasawa niya si Yelena sang 2009. May duha sila ka bata nga lalaki

Nabawtismuhan si Yelena sang 2010. Nag-attend sa mga miting si Mikhail upod sa iya asawa. Nabawtismuhan si Mikhail sang 2016

Ang Ginsiling sang Asawa ni Mikhail nga si Yelena c

Paano kamo sang inyo mga bata padayon nga ginaatipan ni Mikhail kag ginabuligan nga magbakod ang pagtuo bisan pa ara sia sa pretrial detention sa sobra na duha ka tuig?

Ang amon subang nga lalaki 12 anyos na. Ang agot namon nagaedad sing duha ka tuig kag tunga subong kag anom ka bulan pa lang sia sang gin-aresto si Mikhail kag gindala sa pretrial detention center. Wala niya naintiendihan kon ngaa wala sa balay ang iya tatay. Nahidlaw gid ang duha ka bata sa iya. Pero, pirme nagasulat si Mikhail sa ila. Nagapadala sia sang mga poem, ginatudluan niya sila parte sa mga sapat kag mga pispis, nagahimo sia sang mga crossword puzzle, kag ginahatagan niya sila sang gamay nga mga asaynment nga ila i-research. Ginabuligan man niya ako kon may ginapensar ako nga negatibo. May tion nga namangkot ako: ‘Ngaa kami gid? Ngaa natabo ini sa amon pamilya?’ Sa isa niya ka sulat, ginpasalig ako ni Mikhail nga ang akon mga pamangkot wala nagakahulugan nga maluya ang akon pagtuo kay Jehova. Nagsulat sia: “Ang pinakaimportante kon ano ang ginahimo naton kon magbatyag kita sing amo sina. Kon tugutan naton si Jehova nga kay-uhon ang aton panghunahuna, pareho sang ginhimo ni Job, buligan niya kita nga mangin mabakod liwat ang aton pagtuo kag tan-awon ang mga butang pareho sa pagtan-aw sang Dios.” Nagpabakod gid ’to nga sulat sa akon.

Igor Popov

Natawo: 1987 (Kazakhstan)

Biograpiya: Isa sia sa walo ka mag-ulutod. Napatay ang tatay ni Igor sang 11 anyos pa lang sia

Nag-obra sia bilang interior finisher kag tubero

Sang napatay ang tatay ni Igor, nagpa-Bible study ang iya nanay kag ang iya magulang nga lalaki. Nag-upod man si Igor sa Bible study kag nanamian gid sia magtuon parte sa pagkabanhaw. Nabawtismuhan si Igor sang 2006 upod sa pito pa ka miembro sang iya pamilya

Napangasawa niya si Mangira sang 2013

Ang Ginsiling sang Asawa ni Igor nga si Mangira d

Ano nga teksto sa Biblia ang nakabulig sa imo kag sa imo bana para masarangan ining mabudlay nga sitwasyon?

Nagtener sing malawig nga tion si Igor sa bartolina. Sa isa niya ka sulat, ginsambit niya ang Salmo 118:5, nga nagasiling: “Sa akon kalisdanan nagpanawag ako kay Jah; nagsabat si Jah kag gindala niya ako sa lugar nga wala sing katalagman.” Si Igor nagsulat: “Inang lugar nga wala sing katalagman, puede man i-translate nga ‘masangkad nga lugar.’ Kon ang negatibo nga panghunahuna magpabatyag sa aton nga daw na-trap kita, sabton ni Jehova ang aton mga pangamuyo kag daw pareho lang nga paguaon niya kita, paagi sa paghatag sa aton sang kalinong sa hunahuna kag tagipusuon.” Ini nga eksperiensia nagapahanumdom sa amon nga si Jehova magapangita pirme sang paagi para suportahan kami kag indi pagpabay-an bisan diin man kami.

Denis Sarazhakov

Natawo: 1988 (Sayanogorsk, Republic of Khakassia)

Biograpiya: Nag-obra sia sa advertising

Nagdaku sia nga isa ka Saksi ni Jehova. Ginbuligan sia sang iya mga ginikanan nga apresyahon ang espirituwal nga mga butang. Nakumbinsi sia sang nakita niya ang benepisyo sa pagsunod sa mga prinsipio sa Biblia. Nabawtismuhan sia sang 2004

Napangasawa niya si Olesiya sang 2007

Ang Ginsiling sang Asawa ni Denis nga si Olesiya e

Paano ka ginpalig-on ni Denis?

Pirme kami nagaistorya ni Denis paagi sa mga sulat. Ginpasugtan kami nga makaistoryahanay sa telepono sing isa ka bes sa sulod sang lima ka minuto kada semana. Ginpasugtan man ako nga mabisitahan sia sing face-to-face sing isa ka oras, duha ka beses kada bulan. Nagaistorya kami gamit ang telepono nga may kristal nga nagaseparar sa amon. Kada mag-istoryahanay kami, ginasugiran gid ako ni Denis sang makapalig-on nga punto halin sa Biblia. Kag ginapahanumdom niya ako nga indi namon pagkabigon ang amon kaugalingon nga daw makaluluoy. May rason gid nga magkalipay kami sa amon mga nahimo. Ining mabudlay nga sitwasyon wala nagpaluya sa amon. Ang matuod, nagpabakod pa gid ini sa amon.

Aleksey Solnechniy

Natawo: 1976 (Abakan, Krasnoyarsk Territory)

Biograpiya: Nag-obra sia bilang elektrisyan

Ang iya nanay kag manghod nga babayi nagpa-Bible study upod sa mga Saksi ni Jehova samtang nagaserbisyo si Aleksey sa militar. Pagbalik niya, nangin interesado man sia sa Biblia kag nagpa-Bible study. Nabawtismuhan sia sang 2004

Napangasawa niya si Alyona sang 2011

Ang Ginsiling sang Asawa ni Aleksey nga si Alyona f

Ano ang nakabulig sa imo bana nga magpabilin nga positibo samtang ara sia sa prisuhan?

Padayon si Aleksey nga nagapangamuyo para madumduman niya nga proud gid si Jehova sa iya. Ginapensar man niya pirme nga ginahimo lang sang mga pulis kag sang mga opisyal sa korte ang ila trabaho. Nakabulig ini sa iya nga magpokus sa pribilehiyo nga depensahan ang ngalan ni Jehova sangsa iya kaugalingon kag sa iya mabudlay nga sitwasyon. Bisan pa nahidlaw sia sa akon, sa iya pamilya, kag sa iya mga abyan, nagapabilin nga positibo si Aleksey kag palalahog gihapon.

Bisan pa napahilayo sila sa ila mga pamilya subong, makasalig kita nga wala gid sang makapugong sa paghigugma sang Dios sa aton pinalangga nga mga utod samtang padayon sila nga nagabatas sing matutom.—Roma 8:35-39.

Time Line

Oktubre 4, 2021

Gin-raid ang balay sang mga Saksi ni Jehova sa Irkutsk Region. Ginsugdan ang kaso nanday Nikolay, Sergey Kosteyev, Yaroslav, Mikhail, Aleksey, Andrey, kag Sergey Vasiliyev. Ginpriso ang pito ka brother
Oktubre 5, 2021

Si Yaroslav, Mikhail, kag Aleksey ginsaylo sa pretrial detention center
Oktubre 6, 2021

Si Sergey Kosteyev, Nikolay, kag Andrey ginsaylo sa pretrial detention center. Si Sergey Vasiliyev ginpagua sa temporary detention pero gin-house arrest gihapon
Nobiembre 30, 2021

Gin-raid ang madamo pa nga balay. Si Denis kag si Igor gin-aresto kag gindala sa Irkutsk, nga sobra 1500 ka kilometro ang kalayuon
Disiembre 1, 2021

Ginbutang si Igor sa pretrial detention center
Disiembre 2, 2021

Ginbutang si Denis sa pretrial detention center
Disiembre 29, 2022

Ginsugdan ang hearing

a b c d e f Bangod sanday Brother Martynov, Brother Kalin, Brother Moysh, Brother Popov, Brother Sarazhakov, kag Brother Solnechniy ara sa pretrial detention, indi posible nga mainterbyu sila.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE