Sang Hunyo 4, 2021, ginsentensiahan sang Central District Court of Komsomolsk-on-Amur si Brother Nikolay Aliyev sing apat ka tuig kag tunga nga suspended prison sentence.

Nikolay Aliyev

• Natawo: 1978 (Komsomolsk-on-Amur)

• Biograpiya: Sang bata sia, nagapalibog sia kon paano nagluntad ang kabuhi kag ang uniberso. Bangod sini, ginpangita niya ang sabat sa Biblia. Sang natun-an niya ang ginatudlo ni Jesus nga magpakighidait sa iban, nag-untat sia sa sports nga may away-away. Nabawtismuhan sia bilang isa sa mga Saksi ni Jehova sang 1993

  Napangasawa niya si Alesya sang 2016. Ang pila sa nanamian niya amo ang pagbiyahe, pag-hike, kag pag-ski

Sang aga sang Mayo 22, 2020, gin-raid sang mga pulis sa siudad sang Komsomolsk-on-Amur ang balay ni Nikolay kag ni Alesya. Pagsulod sang mga pulis, gintapungol nila si Nikolay amo nga natumba sia. Dayon ginhalughog nila ang ila balay sing lima ka oras antes nila sila gindala para interogahon. Sang gin-interogar sia, ginhambalan sang mga awtoridad si Nikolay nga islan ang iya relihion. Ginpahog man nila si Alesya nga magkooperar para “wala sing matabo nga malain” sa iya bana. Bisan pa sini nga pagpamahog, ginbuy-an sila pagkagab-i kag ginpapauli sa ila balay.

Napabakod gid si Nikolay sang ginpamensaran niya kon paano sia ginbuligan ni Jehova sa sining pagtilaw. Nagsiling sia: “Kon may mga pagtilaw ka nga maeksperiensiahan, kabalo ka nga indi mo ini masarangan kon ikaw lang. Mas nagapokus ako kon paano ginasabat ni Jehova ang akon mga pangamuyo kag kon ano ang iya mga direksion. Naeksperiensiahan ko gid mismo ang ginsiling ni Pablo: ‘Kay kon maluya ako, mabaskog ako.’”—2 Corinto 12:10.

Padayon nga ginatinguhaan ni Nikolay kag ni Alesya nga mangin maisog kag mangin kalmado. Ginbutang nila sa ila refrigerator ang Isaias 41:10. Si Nikolay nagsiling: “Kon mabudlay gani ang sitwasyon, ginabasa ko ini nga teksto, kag nagakaumpawan dayon ako. Napalig-on ako sini nga teksto nga indi mahadlok. Pero ang nagpabakod gid sa akon amo ang pasalig ni Jehova nga ara lang sia sa akon tupad, nga daw pareho lang nga ginahakos niya ako sang iya tuo nga kamot pareho sa isa ka suod nga abyan.” Nagasalig kita nga padayon nga pabakuron ni Jehova ang mga matutom niya nga mga alagad.