NOBIEMBRE 21, 2023
RUSSIA

Nakabaton sang Suspended Sentence ang Apat ka Saksi sa Tula, Russia

I-PLAY

Sang Nobiembre 20, 2023, nagdesisyon ang Proletarskiy District Court of Tula nga guilty sanday Brother Yevgeniy Godunov, Brother Gurami Labadze, Sister Yuliya Popkova, kag Sister Anzhela Putivskaya. Si Yevgeniy kag Gurami ginsentensiahan sang anom ka tuig kag anom ka bulan nga suspended prison ang kada isa. Si Yuliya kag Anzhela ginsentensiahan sang duha ka tuig kag anom ka bulan nga suspended prison ang kada isa. Indi nila kinahanglan nga mapriso sa sini nga tion.

Impormasyon Parte sa Ila

Yevgeniy Godunov

Natawo: 1986 (Nevinnomyssk, Stavropol Territory)

Biograpiya: Nagaobra sia bilang manugkay-o sang mga kompyuter kag telebisyon

Ginpadaku sia bilang isa sa mga Saksi ni Jehova sang iya nanay kag lola. Nabawtismuhan sia sang 2001

Napangasawa niya si Yelena sang 2012

Ang Iya Ginsiling

Ano nga mga leksion ang natun-an mo samtang ara ka sa pretrial detention center?

Ginpamensar ko ang tion sang si Jose ara sa prisuhan. Ang Genesis 39:23 nagsiling: “Si Jehova kaupod ni Jose kag ginhimo ni Jehova nga madinalag-on ang iya ginahimo.” Sang ara ako didto, nangin mas klaro sa akon nga kon suod ako kay Jehova, puede ako mangin malipayon kag makabatas bisan ano man ang akon sitwasyon. Pareho sa ginasiling sang Manugwali 8:12: “Maayo ang madangatan sang mga nagakahadlok sa matuod nga Dios, bangod nagakahadlok sila sa iya.”

Gurami Labadze

Natawo: 1963 (Nigvzara, Georgia)

Biograpiya: Nag-obra sia bilang mekaniko kag taxi driver

Nakilala niya ang mga Saksi ni Jehova paagi sa iya nanay kag magulang nga babayi. Nakita niya ang maayo nga mga resulta sang pagsunod sang mga prinsipio sa Biblia sa iya kabuhi. Nagdayaw gid sia sa gugma sang mga Saksi ni Jehova sa kada isa. Nabawtismuhan sia sang 1996

Napangasawa niya si Galina sang 1995. May isa sila ka bata nga lalaki

Ang Iya Ginsiling

Ngaa nabudlayan ka nga batunon ang bulig halin sa iban?

Sa umpisa, nabudlayan gid ako kay nabal-an ko nga madamo sa mga nagabulig sa akon indi man manggaranon. Pero ginpensar ko ang ginsiling ni Jesus: “Mas malipayon ang nagahatag sangsa nagabaton.” (Binuhatan 20:35) Narealisar ko nga dapat pasugtan ko ang mga kauturan nga maghatag bangod gusto ko nga mangin malipayon sila. Siling ko sa kaugalingon ko: ‘Ano ayhan ang batyagon sang imol nga balo nga babayi kon ginhambalan sia ni Jesus, bangod sa kaluoy, nga taguon niya na lang ang iya duha ka sensilyo?’ (Marcos 12:41-44) Nagapasalamat gid ako nga gin-atipan ako sing maayo sang mga kauturan. Ini nga sitwasyon nagpasuod pa gid sa akon kay Jehova. Wala lang ako nagabasa sang istorya sang iban. Naeksperiensiahan ko gid mismo ang bulig ni Jehova.

Yuliya Popkova

Natawo: 1978 (Bogoroditsk, Tula Region)

Biograpiya: Nag-obra sia sa isa ka daycare center

Gin-imbitar sia sang iya classmate sa miting sang mga Saksi ni Jehova. Nagtuon sia sa Biblia kag natun-an niya nga kabigon si Jehova bilang mahigugmaon nga Amay. Nabawtismuhan sia sang 1999

Ang Iya Ginsiling

Paano nakabulig ang imo relasyon kay Jehova samtang ara ka sa pretrial detention center?

Sang nag-abot ako sa pretrial detention center, klaro gid nga ang pinakaimportante nga butang amo ang akon relasyon kay Jehova. Bisan masako ka sa pag-attend sa mga miting kag sa preaching, indi buot silingon nga may maayo ka nga relasyon kay Jehova. Bangod gintinguhaan ko nga mangin maayo ang akon relasyon sa iya antes sang mga kabudlayan, nangin isa ini ka kahigayunan para ipakita kay Jehova nga gusto ko gid mangin matutom kag mainunungon nga abyan niya. Nabal-an ko nga ginapabaloran gid niya ang akon katutom gani nabuligan ako nga padayon nga mangin matutom sa iya. Ang matuod, isa ka butang lang ang akon ginakahadlukan, kag ina amo ang masubuan si Jehova sa akon.

Ang mga halimbawa sini nga mga kauturan nagpakumbinsi sa aton nga paagi sa pagsalig kay Jehova kag pagsunod sa mga halimbawa sang pagtuo nga mabasa sa Kasulatan, makakita man kita sing paumpaw kag paglaum.—Roma 15:4.

Time Line

Marso 25, 2021

Ginsugdan ang kaso
Abril 13, 2021

Gin-raid ang ila mga balay. Ginpriso sanday Anzhela kag Yuliya
Abril 14, 2021

Ginbutang sanday Anzhela kag Yuliya sa pretrial detention center. Ginpriso si Yevgeniy kag ginkasuhan. Gin-house arrest si Gurami
Abril 16, 2021

Ginbutang si Yevgeniy sa pretrial detention center
Mayo 20, 2021

Si Anzhela, Yevgeniy, kag Yuliya ginpagua sa pretrial detention pero gin-house arrest gihapon
Hulyo 22, 2021

Wala na gin-house arrest sanday Anzhela, Yevgeniy, kag Yuliya pero ginbutangan sang restriksion ang ila pagbiyahe
Hulyo 23, 2021

Wala na gin-house arrest si Gurami pero ginbutangan sang restriksion ang iya pagbiyahe
Mayo 11, 2023

Ginsugdan ang hearing
Nobiembre 20, 2023

Gindesisyunan nga guilty kag ginsentensiahan sang suspended prison

Tan-awa Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE