Sa indi madugay, ipahibalo sang Sharypovo City Court of the Krasnoyarsk Territory ang desisyon sini sa kaso ni Brother Anton Ostapenko. a

Anton Ostapenko

• Natawo: 1991 (Ekibastuz, Kazakhstan)

• Biograpiya: Nagaobra sia bilang boiler inspector sa isa ka power plant. Gintudluan sia sang iya iloy sang kamatuoran sa Biblia sang tin-edyer pa lang sia upod sa iya utod nga babayi. Nabawtismuhan sia bilang isa sa mga Saksi ni Jehova sang 2005

  Napangasawa niya si Natalya sang 2015. Nanamian sila mag-snowboarding kag mag-ski. Mahilig man si Anton maggitara, mangisda, kag maghampang sing tennis

Sang Abril 19, 2019, gin-raid sang mga pulis sa Sharypovo ang pulo ka balay sang mga Saksi ni Jehova kag gin-interogar ang mga kauturan. Gin-aresto si Brother Anton Ostapenko kag gindala sa pretrial detention. Nakagua sia sang Disiembre 20, 2019. Ginkasuhan sia nga nagaorganisar sang mga hilikuton sang isa ka “extremist” nga organisasyon.

Anom ka bulan nga ginbutang si Anton sa pretrial detention. Nagsiling sia nga grabe gid ang iya kabalaka kag nagalalain na gid sia. May mga tion gani nga wala sia nagapakita sa security camera kag nagakadto sa lababo sang iya selda para maghibi.

Nakabulig sa iya ang pangamuyo nga mangin mabakod. Si Anton nagsiling: “Nangamuyo ako kay Jehova nga buligan niya ako nga makabatas.” Nagsiling pa sia: “Madamo ako sing dapat matun-an. Mas nangin suod pa gid ako kay Jehova kag mas nagbakod ang akon pagtuo. . . . Sang una ginapamensar ko lang kon ano ang himuon ko kon mapriso ako, pero subong naagyan ko na mismo ang mabudlay nga sitwasyon [pareho sini]. Isa pa, posible nga wala sing Biblia sa imo selda. Gani, antes ako napriso, madamo ako sing ginbasa parte kay Jehova. Kag sang ara na ako [sa prisuhan], ginpakita gid ni Jehova sa akon kon ano sia nga klase sang Dios. Abi n’yo, nalipay gid ako kay ginpakita niya sa akon nga indi lang sia Labing Gamhanan nga Dios, kundi isa man sia ka mahigugmaon nga Amay. Naintiendihan gid niya ang akon sitwasyon, kag kon kaisa, nagaka-surprise ako sa iya paagi sang pagbulig sa akon kag tayming gid ini pirme sa akon kinahanglanon.”

Napalig-on man sia sang mga Kingdom song. “Pirme kami nagakanta sang akon asawa sang mga Kingdom song, gani nasaulo namon ini. Nakabulig gid ini sa akon sang ara ako sa detention center. Kon patyon na gani ang suga, nagapangamuyo ako dayon kag nagakanta sing Kingdom song. Nalipay gid ako kon himuon ko ini kay makatulog ako nga wala sing ginakabalak-an.”

Ginahulat ni Anton ang desisyon sa iya kaso. Samtang wala pa ini, ginpasugtan sia nga makatrabaho. Pero, indi sia puede maghalin sa Sharypovo. Bangod sini, indi niya maupdan ang iya iloy para magpadoktor.

Ginapangamuyo naton kag nagasalig gid kita nga padayon nga hatagan ni Jehova sing paghidait ang aton mga kauturan nga nagabatas sing paghingabot.—Juan 14:27.