ENERO 27, 2022
RUSSIA

Nakita sang Duha ka Brother Kon Paano Sila Ginbuligan ni Jehova kag Nagpabilin Sila nga Maisog

I-PLAY

Sa indi madugay, ipahibalo sang Kirsanovskiy District Court of the Tambov Region ang desisyon sini sa kaso ni Brother Anton Kuzhelkov kag ni Brother Nikolay Prokhorov. Wala pa sing may ginsiling ang piskal kon ano ang gusto niya nga sentensia sa sini nga kaso.

Time Line

Disiembre 21, 2020

Ginsugdan sang mga awtoridad ang pag-imbestigar kay Anton kag kay Nikolay bangod sang pag-organisar sang mga hilikuton sang isa ka extremist nga organisasyon
Disiembre 24, 2020

Gin-raid sang mga imbestigador ang 19 ka lugar, lakip ang puluy-an ni Anton. Gindala si Anton sa isa ka lugar nga 350 ka kilometro ang kalayuon halin sa iya balay para imbestigahon. Gin-interogar si Anton kag ginmanduan nga indi maghalin sa sina nga lugar
Disiembre 25, 2020

Wala ginpabalik si Anton sa iya puluy-an kundi ginpriso sia sa isa ka pretrial detention center
Agosto 30, 2021

Ginsaylo si Anton sa isa pa ka detention center

Impormasyon Parte sa Ila

Anton Kuzhelkov

Natawo: 1993 (Sortavala, Republic of Karelia)

Biograpiya: Magulang sia sa tatlo ka mag-ulutod nga lalaki. Nanamian sia mangisda kag mag-snowboarding sang bata sia. Natun-an niya ang konstruksion sa iya amay

Nabawtismuhan sia sang 2007. Napangasawa niya si Alyona sang 2015

Ang Ginsiling sang Iya Asawa nga si Alyona a

Ano nga mga problema ang naatubang mo sang gintinguhaan mo nga duawon si Anton?

Sang gintugutan kami nga magkitaay bisan makadali lang, dapat ko kadtuan sing duha ka beses kada bulan ang imbestigador para maglisensia. Nabalaka gid ako kon maglisensia sa iya. Dugang pa, kon gusto ko magkadto sa detention center, dapat may ipakita ako nga pamatuod nga negatibo ako sa COVID-19 test. Mahal ang magpa-test.

Gin-postpone ang tanan nga pagduaw subong, amo nga makapasubo ini. Pero kay nagsugod na ang pag-hearing sa iya, ginatugutan nila ako subong nga magsulod sa korte. Ugaling, ang hearing ginahiwat sa isa ka siudad nga 100 ka kilometro ang kalayuon halin sa amon balay.

Ano ang nakabulig sa imo bana nga mabatas ang pag-detain sa iya?

Ang detalyado kag sinsero nga pangamuyo, kag kon kaisa may mga luha pa nga pagpakiluoy, amo ang nakabulig sa iya nga makabatas. Sa bisan ano nga sitwasyon nga iya maatubang, ara gid ang bulig ni Jehova. . . . Ginatinguhaan man niya nga malingaw sa mga tinuga. Halimbawa, pirme niya ginapanilagan ang mga pispis kon ginapalakatlakat sila sa ugsaran sang prisuhan. . . . Ginapamalandungan niya ang kaalam sang Manunuga kag ang ilustrasyon ni Jesus parte sa mga maya. . . . Amo ini ang nakabulig sa iya nga magpabilin nga malipayon.

Nikolay Prokhorov

Natawo: 1964 (Morshan, Tambov Region)

Biograpiya: Nangin soldado sia. Nanamian sia mag-swimming kag maglagaw

Napangasawa niya si Yelena sang 2008. May bata sila nga isa ka lalaki kag isa ka babayi. Nagtuon sia sa Biblia kay nagdayaw sia sa maayo nga mga paggawi sang mga Saksi ni Jehova. Nabawtismuhan sia sang 2008

Ang Iya Ginsiling

Puede mo bala masugid kon san-o mo nabatyagan ang bulig ni Jehova?

Bisan sa mabudlay [ko] nga mga sitwasyon, pirme nagabulig [sa akon] si Jehova. . . . May mga tion nga ako lang isa ang nagaatubang sa mga agent sang gobierno nga gusto magkooperar ako, ukon indi gani akuon ko nga “nakahimo ako sing krimen.” . . . May bes man nga nagapungko ako kag nagapalibog kon bala makapabilin ako nga matutom kay Jehova kay nahadlok ako. Nangamuyo ako kay Jehova kag nangabay sang kusog kag matawhay nga panghunahuna. Sang nakita sang isa ka opisyal nga nagduko ako para mangamuyo, namangkot sia, “Ano ang ginapangamuyo mo?” Siling ko, “Nagapangabay ako nga indi ako maluoy sa akon kaugalingon.” Nadumduman ko dayon ang Isaias 54:17. Narealisar ko nga wala na sila sing mahimo sa akon. Naghatag ini sa akon sing kompiansa kag natalupangdan pa gani ini sang mga agent. Sang ulihi, gin-untat na nila ang pagpahog sa akon. Ginsilingan pa gani nila ako nga indi ako magdumot sa ila.

Paano kamo nga mag-asawa ginbuligan sang mga kauturan?

Daku gid ang nabulig sa amon sang kongregasyon. Bisan pa nga mahimo sila matalupangdan sang mga ahensia sang gobierno, madamo sa kongregasyon ang nakig-angot sa amon. Nakabaton man kami sang tawag halin sa sarisari nga lugar sa Russia kag sa iban nga pungsod.

Ginsuportahan kami sang tanan sa sinang mabudlay nga sitwasyon. Sa tion sang pag-hearing, ara sila nga nagasuporta sa amon . . . Ining matuod nga gugma sang mga kauturan nangin maayo nga panaksi sa mga nagatambong sa hearing. Ining pagsuporta sa amon nakabulig gid sa amon nga mag-asawa nga mangin matutom kay Jehova.

Makasalig kita nga padayon nga hatagan ni Jehova sing kaisog kag pagsuporta ang aton pinalangga nga mga kauturan nga ginahingabot.—Hulubaton 1:33.

a Bangod ara sa pretrial detention subong si Brother Kuzhelkov, indi sia puede interbyuhon.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE