Sang Hulyo 14, 2021, nagdesisyon ang Zeyskiy District Court of the Amur Region nga guilty si Brother Konstantin Moiseyenko kag ginsentensiahan sia sing anom ka tuig nga suspended prison sentence. Indi niya kinahanglan nga mapriso sa sini nga tion.

Konstantin Moiseyenko

• Natawo: 1976 (Abakan, Republic of Khakassia)

• Biograpiya: May manghod sia nga kapid nga lalaki. Sang bata pa sia, nagaentra sia sa martial arts. Nangin isa sia ka computer systems administrator kag service engineer

  Sang 1998, napangasawa niya si Margarita nga isa ka fashion designer. Sang 2000, nagtuon sila sing Biblia upod sa mga Saksi ni Jehova. Nanamian gid si Konstantin sa mga kasaysayan sa Biblia kag nagdayaw gid sia kay sibu ini sa siensia, gani nagpadayon sia sa pagtuon sing Biblia. Sang ulihi sina nga tuig, nabawtismuhan sila nga mag-asawa

  Napatay ang iya amay pulo ka tuig na ang nagligad. Gin-atipan niya ang iya bulag nga lola sing anom ka tuig asta nga napatay ini

Sang Marso 11, 2019, ginkasuhan sing Investigative Department of the Federal Security Service (FSB) sa Amur Region si Brother Konstantin Moiseyenko. Pagkatapos sina, gin-raid sang mga pulis ang lima ka balay sang mga Saksi ni Jehova, lakip ang balay ni Konstantin. Ginkompiskar sang mga awtoridad ang ila mga laptop, mga cell phone, kag ang ila personal nga mga dokumento. Ginbutang ang ngalan ni Konstantin sa listahan sang mga extremist sa Russian Federation. Bangod sini, indi na niya ma-withdraw ang iya kuarta sa banko.

Nadumduman ni Konstantin ang iya eksperiensia sang nag-attend sila sang iya asawa sa isa ka kombension sa Seoul, South Korea, sang 2018. Sa tion sang programa, ginpangabay sang isa ka speaker nga magtindog ang mga napriso bangod sang ila pagpabilin nga neutral. “Halos tanan nga brother sa stadium nagtindog,” siling ni Konstantin. “[Ang speaker] nagsiling: ‘Tan-awa! Buhi sila kag maayo ang ila kahimtangan!’ Nagpalig-on ini sa akon nga posible gid makabatas ang isa kon hingabuton sia.” Ginpadaku man sang speaker ang Salmo 23:5: “Ginahatagan mo ako sing kabuganaan sa tunga sang akon mga kaaway. Ginpaumpawan mo sing lana ang akon ulo; ginpuno mo ang akon kopa.” Nagsiling si Konstantin nga nagpalig-on gid ini sa iya.

Nagapasalamat man si Konstantin sa bulig sang mga kauturan. Nagdayaw gid sia kay interesado gid ang mga kauturan sa bilog nga kalibutan parte sa iya kaso kag nagapangamuyo sila para sa iya. Nagsiling sia: “Nakakita ako sing dakung kadam-an sang mga kauturan nga nagatindog sa tupad sang kada brother kag sister nga ginahingabot sa sini nga pungsod. Ginaaplikar gid sini nga mga kauturan ang ginsiling sang 1 Juan 3:16, nga nagasiling: ‘Obligado kita nga ihatag ang aton kabuhi para sa aton mga kauturan.’”

Nalipay gid kita nga mahibaluan nga padayon nga ginapabakod ni Jehova ang aton mga kauturan sa Russia. Nagapasalig ini sa aton nga kon hingabuton man kita, sigurado nga hatagan man kita ni Jehova sing “kusog kag gahom.”—Salmo 68:35.