Sang Oktubre 7, 2020, ginpamatbatan sang Mayskiy District Court sang Kabardino-Balkarian Republic si Brother Yuriy Zalipayev nga not guilty kag hilway na sa tanan nga panumbungon sa iya. May napulo ka adlaw nga puede maka-appeal ang piskal.

Suno sa piskal, ginasugyot ni Brother Zalipayev ang iban nga maghimo sing malain. Pero, sobra 30 ka tawo ang nagtestigo nga wala sia sing nahimo nga malain. Sa baylo, ginapalig-on pa niya gani ang iban nga basahon ang Biblia kag mangin mainabyanon kag mainayuhon sa tanan nga tawo.

Ang desisyon sang korte nga “not guilty” nabase man sa ginsiling sining karon lang sang UN Working Group on Arbitrary Detention nga ang mga Saksi ni Jehova wala nagahimo ukon nagasugyot sa iban nga maghimo sang bisan ano nga malain.

Sa tapos ginpahibalo ang desisyon, si Brother Zalipayev nagsiling: “Ang akon pamilya kag mga abyan handa sa ano man nga matabo nga mas grabe pa gid. Pero nagapasalamat ako kay Jehova kay ginbuligan niya ako nga mangin kalmado sa tion sang bista. Nagapasalamat gid ako sa tanan nga nagbulig kag nagtestigo sa akon.”