HUNYO 1, 2022
RUSSIA

Padayon Sila nga Nangin Malig-on kay si Jehova Dampig sa Ila

I-PLAY

Sa indi madugay, ipahibalo sang Nizhnekamsk City Court of the Republic of Tatarstan ang desisyon sini sa kaso nanday Brother Denis Filatov, Brother Stanislav Klyuchnikov, kag Brother Dmitriy Yarchak. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Nobiembre 18, 2020

Gin-raid sang mga agent sang FSB kag sang armado gid nga riot police ang mga balay sang 12 ka pamilya sang mga Saksi ni Jehova sa siudad sang Nizhnekamsk. Gindala para interogahon ang siam ka brother kag tatlo ka sister
Agosto 24, 2021

Bilang resulta sang imbestigasyon, ginbutangan sing restriksion ang pagbiyahe nanday Denis, Stanislav, kag Dmitriy
Oktubre 7, 2021

Ginkasuhan sanday Denis, Stanislav, kag Dmitriy. Gin-akusar sila nga “nagakanta sang espesyal nga mga kanta parte sa relihion, kag pagpangamuyo”
Enero 27, 2022

Ang kaso ginsaylo sa Nizhnekamsk City Court of the Republic of Tatarstan

Impormasyon Parte sa Ila

Denis Filatov

Natawo: 1980 (Nizhnekamsk)

Biograpiya: Nakilala niya ang mga Saksi ni Jehova sang 1996. Nagdayaw gid sia sang natun-an niya ang personal nga ngalan sang Dios kag ang kamatuoran parte sa kahimtangan sang mga patay. Nabawtismuhan sia sang 1998

Ang Iya Ginsiling

Ano ang nakabulig sa imo nga magpokus sa pag-alagad kay Jehova bisan pa sang imo sitwasyon?

Naintiendihan ko gid nga nagapakig-away sa aton si Satanas kag ang iya kalibutan. Bangod sa akon pagbasa sa Biblia, nahibaluan ko gid kon sin-o ang magadaug kag kon sin-o ang mapierde. Madasig nga nagabag-o ang mga hitabo sa kalibutan, kag malapit na lang ang bag-o nga kalibutan. Kinahanglan naton nga magbatas sa malip-ot na lang nga tion, magpabilin nga matutom, kag magpadayon sa pagpangabudlay kaupod sa aton pinalangga nga mga kauturan.

Stanislav Klyuchnikov

Natawo: 1982 (Nizhnekamsk)

Biograpiya: Tag-iya sia sang isa ka kompanya sang video production. Nanamian sia magpangolekta sang mga stamp kag maglagawlagaw sa gua

Nakilala niya ang mga Saksi ni Jehova sang pamatan-on pa sia kag nagdayaw sia sa kaayo kag gugma nga ginpakita sa iya. Nabawtismuhan sia sang 1998

Napangasawa niya si Oksana sang 2003. May isa sila ka bata nga babayi

Ang Iya Ginsiling

Paano ka nakapadayon sa pagbatas?

Ang akon pagtinguha nga magpadayon sa paglakat sa mabudlay nga dalan pakadto sa matuod nga kabuhi nakabulig sa akon nga padayon nga magbatas. Ugyon gid ako sa ginsiling ni apostol Pedro sa Juan 6:68: “Ginuo, kay sin-o kami makadto? Ikaw ang may pinamulong sang kabuhi nga wala sing katapusan.” Ang iya ginsiling nagapakita nga bisan ano pa nga dalan ang gusto ni Satanas nga laktan naton, isa lang ang matuod nga dalan pakadto sa matuod nga Dios. Indi gid maayo kon balibaran naton ang Isa nga magabulig, magasuportar, kag magadampig sa aton!

Dmitriy Yarchak

Natawo: 1984 (Nizhnekamsk)

Biograpiya: May ara sia cerebral palsy. Pagkagradweyt niya sa eskwelahan, nag-obra sia bilang accountant sa isa ka rehabilitation facility para sa may kasablagan ukon may diperensia nga mga bata. Sang ulihi nag-obra sia bilang sales manager sa isa ka telecommunications industry

Nagtuon sia sa Biblia sang tin-edyer pa sia. Nanamian gid sia sa iya natun-an parte sa personalidad ni Jehova. Nabawtismuhan sia sang 1998

Napangasawa niya si Svetlana sang 2010

Ang Iya Ginsiling

Ano nga aman ni Jehova ang nakabulig gid sa imo?

Nalipay gid ako pirme magpangamuyo. Nabatyagan ko nga kaupod ko ang akon Amay sa bilog ko nga kabuhi kag asta subong kaupod ko gihapon sia. Nagapangamuyo ako sa iya kag nagapangabay sang kaalam para mahimo ko ang insakto. Nagapangabay man ako sang bulig nga mangin kalmado kag mangin husto ang akon pagtan-aw sa akon sitwasyon.

Ining aton mga kauturan padayon nga nagasalig nga pabakuron sila ni Jehova. Sigurado nga pareho sa manunulat sang Salmo nga si David, nagasiling man sila: “May pagsalig ako nga ang Dios dampig sa akon.”—Salmo 56:9.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE