Sa Russia, ang Federal Service for Financial Monitoring (Rosfinmonitoring) amo ang ahensia sang gobierno nga nagakontra sa krimen nga may labot sa kuarta. Halimbawa, nagapanghikot ini para indi makabaton sang kuarta ang extremist nga mga organisasyon. Ini man nga ahensia ang may listahan sang mga tawo nga ginasuspetsahan nga extremist ukon terorista. Puede mabutang sa sini nga listahan ang isa ka tawo bisan pa wala sia napamatud-an nga guilty sa korte.

Sugod sang 2017, sang gin-ban sang Supreme Court of the Russian Federation ang mga hilikuton sang mga Saksi ni Jehova, ginbutang sa sini nga listahan ang 525 ka ngalan sang aton mga kauturan. a Nalakip sa sini ang sobra 100 ka tigulang nga mga Saksi.

Ang mga ara sa sini nga listahan ginabudlayan gid bangod sa mga restriksion sa paggamit sang ila kuarta. Halimbawa, gina-freeze ang ila mga bank account, kag mga 10,000 rubles ($137 U.S.) lang ang puede ma-withdraw kada bulan para sa kada miembro sang pamilya. Madamo pa gid sang ginapatuman nga mga restriksion nga nagapabudlay sang ila pangabuhi. Halimbawa, mabudlay gid para sa ila nga magbakal ukon magbaligya sang propiedad ukon salakyan, magkuha sang insurance ukon sang mga unemployment benefit, magbaton sang palanublion, ukon mag-loan sa banko. Naapektuhan gid sini ang mga Saksi nga pensionado ukon dis-ebol bangod wala na sila sang igasto sa ila pagpabulong kag sa masami wala sila ginatugutan nga magsakay sa de-pasahero nga mga salakyan.

Si Brother Anton Chermnykh sa Ussuriysk, nga gindugang sa listahan sang Disiembre 2019, nagsiling: “Para makuha ko ang akon sueldo, kinahanglan ko pamatud-an kada bulan nga ang akon kuarta indi halin sa ilegal nga hilimuon. Kinahanglan ko dal-on sa banko ang madamo nga dokumento para i-scan sang mga empleyado kag ipadala sa Moscow. Ang pag-usisa sang gobierno sa mga dokumento nagalawig sing duha ka semana. Sa gin-schedule nga adlaw, mabalik ako sa banko kag kuhaon sang empleyado sang banko ang akon sueldo sa akon bank account kag ihatag ini sa akon. Dayon i-freeze niya liwat ang akon account. Kon mabal-an sang bag-o nga mga empleyado sang banko nga ara ako sa listahan sang mga terorista, nahadlok sila sa akon.”

Bisan pa sini nga mga kabudlayan, ang aton mga kauturan positibo lang gihapon. “Gin-block ang akon mga bank account,” siling ni Brother Yuriy Belosludtsev, nga ginbutang man sa listahan mga duha ka tuig kag tunga antes sia ginsentensiahan sing anom ka tuig nga suspended prison. “Pero kami sang akon asawa ginbuligan sang mga kauturan. Nagapasalamat gid kami kay Jehova kay wala nila kami ginpabay-an.”

Nahibaluan naton nga nakita gid ni Jehova ang mga inhustisya nga ginabatas sang aton mga kauturan sa Russia. Nagapangamuyo kita kag nagasalig gid nga padayon sila nga atipanon ni Jehova samtang wala pa natapos ini nga pagtilaw.—Mateo 6:33.