Sang Abril 20, 2017, gindumilian sang Supreme Court sang Russia ang pagsimba sang mga Saksi ni Jehova sa sina nga pungsod. Bilang resulta, ang aton kauturan didto ginahingabot kag ginapriso. Amat-amat man nga gin-agaw sang mga awtoridad ang 131 ka propiedad nga ginapanag-iyahan sang mga Saksi ni Jehova, kag 60 pa ka propiedad ang ginatinguhaan pa gid nga agawon sa ila. Sa kabilugan, ini nga mga propiedad ginbulubanta nga nagabalor sing sobra 57 ka milyon ka dolyar.

Ang isa sa sining mga propiedad nga gin-agaw amo ang daan nga sanga talatapan sa Solnechnoye—isa ka propiedad nga ginapanag-iyahan sang Watch Tower Bible and Tract Society of Pennsylvania. (Tan-awa ang piktyur sa wala.) Ini lamang nga propiedad nagabalor sing mga 30 ka milyon ka dolyar. Ang 43 pa ka propiedad nga gin-agaw ginapanag-iyahan sang legal nga mga organisasyon sa Austria, Denmark, Finland, Netherlands, Norway, Portugal, Spain, Sweden, kag United States. Ang pag-agaw sini nga mga propiedad ilegal, kay ang pagdumili sang Supreme Court sa mga Saksi ni Jehova wala nagahatag sa gobierno sing kinamatarong nga agawon ang mga propiedad nga ginapanag-iyahan sang iban nga pungsod.

Ang mga Saksi ni Jehova nagpasaka na sing reklamo sa European Court of Human Rights (ECHR) parte sa ilegal nga pag-agaw sang daan nga propiedad sang sanga sa Russia. Bisan ano man ang mangin desisyon sang ECHR, nagasalig kita kay Jehova. Nagapangamuyo kita nga bisan pa gina-raid, ginaaresto, kag ginaagawan sang ila mga tilipunan para sa pagsimba ang aton kauturan sa Russia, magapadayon sila nga may kaisog sa pagsimba kay Jehova “sa espiritu kag kamatuoran.”—Juan 4:23.