Madamo sa aton mga brother nga napriso sa Russia ang may asawa kag mga kabataan. Nangin mabudlay gid ang ila kabuhi sang napriso sila, pero mas mabudlay pa gid ini para sa ila mga pamilya. Puerte gid kabudlay para sa ila asawa kag kabataan nga mapalayo sa ila. Magluwas sina, may ara pa sila adlaw-adlaw nga mga problema. Ang pulo ka asawa sang mga brother nga napriso naghimo sing joint letter, ginpirmahan ini, kag ginpadala nila sa mga awtoridad sang Russia. Ginsugid nila sa sini nga sulat ang ila mga ginabatyag. Nagasiling ini: “Nagsulat kami sa inyo para magpakitluoy. Ang mga tawo nga palangga gid namon . . . ginpriso bangod lang, upod sa amon, sa amon kabataan, kag sa amon mga abyan, ginabasa nila ang mga kasuguan sa Biblia kag nagapangamuyo sa Dios.”

Ginsugid sang pila naton ka sister ang mga kabudlayan nga ila naeksperiensiahan kag kon paano sila ginbuligan ni Jehova nga mabatas ang ila mga problema sang napriso ang ila mga bana.

Nabudlayan ang madamo nga sister nga istoryahon ang ila mga bana paagi sa telepono bangod sa pila ka problema. Isa pa, ang mga sulat nga ginapadala nila madugay pa igo i-deliver, kon ma-deliver gid man.

Ang bana ni Sister Yevgeniya Lagunova nga si Feliks Makhammadiyev, sobra na duha ka tuig nga napriso. Kon kaisa, madugay pa antes sia makabaton sing sulat halin sa iya bana. Nagsiling sia nga kabudlay gid kon indi niya mabal-an kon bala OK pa ang iya bana. Nagakabalaka man sia kay basi nagabatyag ang iya bana nga ginapabay-an sia bangod wala gid sia sing may nabaton nga sulat halin kay Yevgeniya.

Nagabiyahe pa sing malayo ang madamo nga asawa para bisitahon ang ila mga bana. (Tan-awa ang tsart nga “Kalayuon nga Ginabiyahe sang mga Asawa Para Bisitahon ang Ila mga Bana.”) Halimbawa, si Yevgeniya nagsiling: “Nagadrayb ako sing sobra 800 kilometros para bisitahon ang akon bana sa prisuhan.” Halos tatlo asta apat ka adlaw, pakadto-pakari, ang ginabiyahe niya para bisitahon ang iya bana halin sa ila balay. Ang iban nga mga sister nagabiyahe sing mga 1,000 ka kilometro. Kag kon makaabot na ini nga mga sister sa prisuhan, kinahanglan pa nila magpila sa gua kag sa masami puerte kalaba sang pila.

Si Sister Irina Christensen amo ang asawa ni Dennis, ang una nga Saksi nga ginpriso sa Russia sugod sang pag-ban sang 2017. Regular sia nga nagabiyahe sing mga 200 kilometros halin sa ila balay sa Oryol para bisitahon si Dennis sa prisuhan sa Lgov. Nagsiling sia: “Kabudlay gid magkadto sa prisuhan kay magluwas nga kakapoy, grabe man ang akon kasubo. Kinahanglan ko na maghalin sa balay sing alas 3:30 sang kaagahon para pagka-alas 8:00 ara na ako sa prisuhan kay kinahanglan ko pa ipasa ang pila ka dokumento. Dayon mahulat ako asta alas 11 sang aga nga amo ang oras sang pagbisita.” Kon ginapamangkot sia sang iban kon paano niya ini tanan nabatas, amo ini ang ginasiling ni Irina: “Pirme ako nagapangamuyo kay Jehova. Nagapangabay ako sa iya nga buligan niya ako kag ang aton tanan nga mga kauturan, ang mga utod nga suod sa amon, ang mga ara sa prisuhan, kag tanan nga kauturan sa bilog nga kalibutan.”

Sobra na duha ka tuig nga layuay sanday Sister Nadezhda German kag ang iya bana nga si Gennadiy. Pareho sa iban nga mga asawa nga napriso ang bana, nasubuan man sia bangod indi na sila updanay sang iya bana. Pero amo ini ang ginsiling ni Nadezhda: “Nangin pamilya ko gid ang kongregasyon. Nabatyagan ko gid ang ila matuodtuod nga pagpalangga kag ang ila pag-atipan sa akon kag sa akon bana.”

Ang bana ni Yuliya Miretskaya, nga si Aleksey, napriso man upod kay Gennadiy. Si Yuliya nagsiling: “Ginabuligan kami sang mga kauturan sa mga ulubrahon sa balay. Napalig-on gid ako kay ara gid ang amon mga abyan nga handa magbulig sa amon.”

Si Sister Tatyana Budenchuk kag ang iya bana nga si Aleksey may duha ka bata. Napriso ang iya bana sugod sang Septiembre 2019, kag sugod sadto, si Tatyana na lang ang nagaatipan sa ila. Nagsiling sia: “Ginapanikasugan sang amon mga bata nga magpokus sa mga pagpakamaayo ni Jehova, sa iya ginahatag sa amon, kag kon paano niya kami ginabuligan. Kabalo sila nga ini nga kabudlayan temporaryo lang kag ang pagpakita sing mabakod nga pagtuo kay Jehova kag pagpabilin nga matutom sa iya amo pinakaimportante subong.”

Sang Marso 2020, ginsentensiahan ang bana ni Sister Natalya Filatova nga si Sergey Filatov nga mapriso sing anom ka tuig. Sugod sadto, si Natalya na lang ang nagaatipan sa ila apat ka kabataan. Amo ini ang ginsiling niya parte sa ila: “Nahidlaw na gid sila sa ila papa kag nagakabalaka gid sila kon naano na ’to sia sa prisuhan. Pirme gid nila sia ginapangamuyo. Ginsulatan sang amon kinagot nga bata nga babayi si Papa niya kag ginpasalig niya sia nga OK lang kami kag indi sia dapat magkabalaka. Pero siempre kanami gid ’ya tani kon kaupod sia namon sa balay.”

Ginatinguhaan gid sang pamilya nga iaplikar ang laygay sang Biblia nga magkabuhi lang sing simple. Si Natalya nagsiling: “Natun-an ko nga maggasto lang suno sa amon badyet kag indi magbakal sang indi kinahanglan. Iguigo lang ang amon kuarta para sa mga galastuhan kag sa amon mga kinahanglanon.”

Bisan pa sini nga mga kabudlayan, mabakod gihapon ang pagtuo sang aton mga sister. Ngaa? Bangod padayon sila nga nagasimba kay Jehova sing regular. Si Yuliya nagsiling: “Ginatinguhaan ko nga mabasa ang tanan nga bag-o nga mga publikasyon. Daw pareho lang nga ginasakop ko sa pagtuon ang akon bana. Kay kon maistorya ko gani si Aleksey, ginatinguhaan ko nga madumduman ang akon natun-an para masugid ko ini sa iya.” Si Nadezhda nagsiling: “Sa bulig ni Jehova, wala sing problema nga indi masolbar. Suod gid ako sa Dios. Pamatyag ko daw bata lang ako nga gamay nga ginakugos sang akon labing gamhanan nga Amay. Kag kon ginabuligan ko ang iban, pamatyag ko ginabuligan ko man ang akon kaugalingon.”

Amo man sini ang ginsiling ni Natalya: “Nadumduman ko ang ginsiling sang isa ka sister: ‘Ang kada alagad sang Dios nagakinahanglan sing paumpaw, pero ang kada isa Niya ka alagad may mahimo man para paumpawan ang iban.’ Nalipay gid ako kon ginapaumpawan ukon ginapalig-on ko ang iban.” Nagsiling pa si Natalya: “Ginasubuan ako kag kabudlay gid kay wala ang akon bana. Pero bisan pa sini, wala ko ginakaluuyan ang akon kaugalingon kag ginatinguhaan ko man nga indi ma-depress. Wala ko gid ginahatagan sing tsansa si Satanas nga paluyahon ang akon buot.”

Ginarespeto gid sang mga kauturan sa bilog nga kalibutan ang katutom kag pagbatas sang mga pamilya sa Russia kag sa iban pa nga lugar nga may miembro sang pamilya nga napriso. Kabalo kita nga ginapabaloran gid ni Jehova ining pinalangga naton nga mga kauturan kag ‘hamili gid sila sa iya.’—Isaias 43:4a.