Padayon nga gina-hearing sang Spassk District Court of the Primorsky Territory ang kaso nanday Brother Dmitriy Malevaniy, Brother Aleksey Trofimov, Sister Olga Opaleva, kag Sister Olga Panyuta. a Wala pa sing may ginsiling ang piskal kon ano nga sentensia ang gusto niya sa sini nga kaso.

Dmitriy Malevaniy

• Natawo: 1990 (Spassk-Dalny)

• Biograpiya: Nagtudlo sia sing computer programming. Ang iya asawa nga si Ulyana isa ka artist. Sang tin-edyer sia, nagtuon sia sing Biblia upod sa mga Saksi ni Jehova. Kumbinsido gid sia nga masaligan ang ginasugid sang Biblia kag mangin malipayon gid ang kabuhi sang isa kon iaplikar niya ang mga ginapatuman sang Biblia. Nabawtismuhan sia sang 2004

Olga Opaleva

• Natawo: 1952 (Spassk-Dalny)

• Biograpiya: Sang bata sia, nagapati man sia sa Dios, pero indi sia interesado sa Biblia. Sang napatay ang iya 22 anyos nga bata nga babayi, may nakilala sia nga mga Saksi ni Jehova. Nalipay gid sia sang nabal-an niya ang promisa sang Biblia parte sa pagkabanhaw. Padayon nga nagbakod ang iya pagtuo. Bangod sini, ginsugid niya sa iban ang iya paglaum. Nabawtismuhan sia sang 1995. Nanamian sia sa music kag mahilig sia magkanta halin pa sang gamay sia. Ang nanamian gid niya nga kantahon amo ang mga Kingdom song

Olga Panyuta

• Natawo: 1959 (Nizhny Novgorod)

• Biograpiya: Antes sia nag-retire, isa sia ka maestra sa kinder kag nagtrabaho sia bilang isa ka social worker. Napamana niya si Vladimir sang 1982. May tatlo sila ka bata, duha ka babayi kag isa ka lalaki, kag mga adulto na subong ang ila mga bata. Nagtuon sia sing Biblia upod sa mga Saksi ni Jehova kag nanamian gid sia sa Biblia kay maathag ini kag hapos lang intiendihon. Nabawtismuhan sia sang 1996

Aleksey Trofimov

• Natawo: 1959 (Mamakan, Irkutsk Region)

• Biograpiya: Nakilala niya ang iya asawa nga si Tamara sang nag-eskwela sia sing college sa Vladivostok. May apat sila ka bata kag may mga apo. Nagtrabaho sia bilang manughimo kag manugkay-o sing kandado kag sining karon lang nagtrabaho sia bilang supervisor sa isa ka boiler room. Sang umpisa sang dekada ’90, sa tapos niya matun-an nga ang mga ginatudlo sang Biblia makabulig sa iya para mangin malipayon ang iya kabuhi, nagdesisyon sia nga mag-alagad kay Jehova. Nabawtismuhan sia sang 1996

Sang Nobiembre 25, 2018, ginsulod kag ginhalughog sang mga awtoridad ang apat ka balay sang mga Saksi sa banwa sang Spassk-Dalny. Para masulod ang apartment ni Olga Opaleva, ginguba nila ang puertahan gamit ang de-kuryente nga lagari. Sang nakasulod na ang mga pulis, ginpamangkot nila sia kon ngaa wala niya ginbuksan ang puertahan. Indi sia makasabat sing tadlong. Nagtawag sing ambulansia ang mga pulis, kag nabal-an nila nga na-heart attack sia. Pagkagab-i, ginkuha sia sang mga pulis sa ospital kag gindala sa opisina para interogahon. Bangod sa heart attack, indi na masyado mahulag ni Olga ang iya wala nga kamot kag tiil. Ang iya bata nga si Brother Vitaliy Ilinykh nga amo ang nagaatipan sa iya, ginpasakaan man sing kaso.

Gindala sila nga apat sa isa ka temporary detention center kag nagtener sila didto sing duha ka adlaw. Sang Nobiembre 27, 2018, ginsentensiahan sila nga i-house arrest. Pagligad sang isa ka tuig, nagmag-an na ang pila ka pagdumili sa ila.

Ginkasuhan sila nga nagaorganisar kuno sang mga hilikuton sang isa ka extremist nga organisasyon.

Nagapalibog ang ila mga abyan kag mga paryente, lakip ang indi mga Saksi, kon ngaa ginkasuhan sila bangod sa ila pagtuo kay mabuot man sila nga mga pumuluyo. Bisan gani ang mga katrabaho ni Dmitriy nga indi mga Saksi, nagsuporta sa iya kag ginapalig-on nila sia nga indi mag-untat.

Para kay Dmitriy, nangin malipayon sia bisan pa ginahingabot bangod kay wala sia ginapabay-an ni Jehova. Nagsiling sia: “Ang baston ni Moises nagapamatuod nga kaupod niya si Jehova, gani ang akon kalipay nagapamatuod nga ginabuligan ako ni Jehova.” Nagsiling pa sia nga ang iya kalipay “mangin mabakod nga panaksi sa tanan nga nagatrabaho sa korte kag sa mga imbestigador.”

Si Olga Opaleva nagsiling: “Samtang ginapamalandungan ko kon paano ako nakabatas, na-realize ko nga bangod ini sa pagbulig pirme ni Jehova sa akon. Mas nagsalig pa gid ako kay Jehova bisan sa gagmay lang nga mga butang. Ginatugyan ko gid sa iya ang tanan.”

Ginsugid man ni Aleksey kon ano ang nakabulig sa iya sang ara sia sa pretrial detention kag sang gin-house arrest sia: “Ginbuligan ako [ni Jehova] nga mangin mabakod. Nabatyagan ko gid ini sang ara ako sa temporary detention facility. Nangamuyo ako kay Jehova nga buligan ako nga mangin maisog. Nabatyagan ko dayon nga nag-untat ang pagpalangurog sang akon kamot kag tiil kag sang akon tingog. Nagdesisyon man ako nga mag-adjust sa akon bag-o nga sitwasyon.”

“Nadalahig diri ang ngalan ni Jehova,” siling Olga Panyuta. “Gani, dapat kita magsalig kay Jehova, mag-alagad sa iya sa bug-os naton nga masarangan, kag pabakuron ang aton kaangtanan sa iya.”

Samtang ginahulat sang aton pinalangga nga mga kauturan ang desisyon sa korte sa ila kaso, ginapangamuyo naton nga padayon sila nga magsalig kay Jehova bilang ila “Igang” nga buligan sila nga makabatas.—Deuteronomio 32:4.