Sang Mayo 31, 2021, nagdesisyon ang Gornomariyskiy District Court of the Republic of Mari El nga guilty si Sister Yekaterina Pegasheva. Ginsentensiahan sia sing anom ka tuig kag tunga nga suspended prison sentence.

Yekaterina Pegasheva

• Natawo: 1989 (Gaintsy, Kirov Region)

• Biograpiya: Bugtong sia nga bata. Nanamian sia magbasa sing libro, magsulat sing binalaybay, kag magkanta. Nagtrabaho sia bilang housekeeper. Nagtuon sing Mari nga lenguahe para ma-preachingan ang mas madamo nga tawo

Sang Oktubre 3, 2019, gin-aresto si Sister Pegasheva sa Yoshkar-Ola, ang kapital sang Republic of Mari El. Ginhalughog sang mga pulis ang iya balay kag ginkompiskar ang iya mga libro, mga gadyet, mga sulat, kag mga dokumento. Ginkasuhan si Yekaterina nga nagapakigbahin sa hilikuton sang gin-ban nga organisasyon kay ginabinagbinag niya ang Biblia upod sa iya mga kauturan.

“Nakibot gid ako kay gulpi lang ako gin-atake sang mga pulis sa dalan kag ginbaklid ako kag ginduso ako pakadto sa isa ka kahoy,” siling ni Yekaterina. “Pareho kay Nehemias, nangamuyo ako dayon nga buligan ako ni Jehova.” Sa tapos sang pag-aresto sa iya, gindala sia sa pretrial detention kag nagtener didto sing sobra 100 ka adlaw. Subong, naka-house arrest si Yekaterina.

Pirme ginainterogar si Yekaterina sang ara sia sa pretrial detention. Nagsiling sia nga nakabulig gid sa iya ang iya natun-an sa Biblia. Nagsiling sia: “Gindumdom ko ang mga talk kag ang akon mga asaynment sang nag-eskwela ako sa School for Kingdom Evangelizers. Amo ini ang isa nga nakabulig gid sa akon: Kon ginainterogar ka sang mga nagahingabot kag ginasabat mo ang ila mga pamangkot, daw pareho lang nga nagatindog ka man sa atubangan ni Ginuong Jesus. Nakabulig ini sa akon nga punggan ang akon kaugalingon kag respetuhon ang mga awtoridad bisan pa indi husto ang akusasyon nila sa akon.”

Nabudlayan gid si Yekaterina sang ginbutang sia sa detention center kag gin-house arrest sing sobra isa ka tuig. Naglala ang iya ginabatyag sa lawas, kag indi sia makaobra. Mabudlay pa gid kay indi niya kaupod ang iya iloy kag lola. Pero bisan pa sini nga kabudlayan, determinado si Yekaterina nga padayon nga mangin matutom. Nagsiling sia: “Samtang mas nagabudlay ang akon sitwasyon, ginatinguhaan ko pa gid nga isuksok ang espirituwal nga hinganib.” Nagsiling pa sia: “Wala na ko subong sing may ginakahadlukan! Maisog na ako antes pa sini nga paghingabot, pero bangod ginbuligan ako sang espiritu sang Dios, nangin mas maisog pa gid ako.”

Samtang ginahulat ni Yekaterina ang sentensia sa iya, kabalo kita nga padayon sia nga magasalig kay Jehova, nga nagapabakod sa tanan niya nga mga alagad.—Exodo 15:2.