NOBIEMBRE 28, 2022
RUSSIA

Pag-atubang sang Kabalaka Paagi sa Pagsalig kay Jehova

I-PLAY

Sa indi madugay, ipahibalo sang Leninskiy District Court of Nizhny Novgorod ang desisyon sini sa kaso nanday Brother Oleg Konshin, Brother Sergey Malyanov, kag Brother Roman Zhivolupov, a kag sa bata ni Sergey nga si Sister Svetlana Malyanova. Wala pa sing may ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Oleg Konshin

Natawo: 1971 (Luga, Leningrad Region)

Biograpiya: Isa sia ka mekaniko. Napangasawa niya si Irina sang 1991. May duha sila ka bata nga lalaki

Nakilala niya ang mga Saksi ni Jehova sang nagtuon ang iya nanay sa Biblia. Nagdayaw gid sia sa mga pagbag-o sang iya nanay gani gusto niya magtuon man. Nabawtismuhan sia sang 2003

Ang Iya Ginsiling

Ano ang imo natun-an sa paghingabot nga imo naeksperiensiahan?

Narealisar ko nga mas makahaladlok ang paghingabot kon indi pa ikaw ang ginahingabot. Kay kon ikaw na ang ginahingabot, mabatyagan mo gid dayon nga ginapakalma ka ni Jehova, kag ginahatagan sing kusog kag sing paghangop nga kinahanglan mo. Bangod sini mas may kompiansa ako sa kon ano ang dapat ko himuon kag ihambal. Nakabulig man ini sa akon nga indi pagkabalak-an ang mga butang nga indi man gali dapat kabalak-an.

Sergey Malyanov

Natawo: 1969 (Nizhny Novgorod, Nizhny Novgorod Region)

Biograpiya: Gin-train sia bilang figure skater halin sang bata pa sia. Nalibot na niya ang bilog nga Russia kag ang iban nga pungsod bilang ice acrobat sang Moscow Circus on Ice. May isa sia ka bata nga babayi nga si Svetlana nga upod man niya nga ginkasuhan

Nagtuon sia sa Biblia sang ginpakilala sa iya sang upod niya nga performer ang mga Saksi. Nag-attend sia sa mga miting sa madamo nga lugar kay nagabiyahe sia upod sa circus troupe. Natandog gid sia sang gugma kag paghiusa nga nakita niya. Nabawtismuhan sia sang 1998

Ang Iya Ginsiling

Sa sining mabudlay nga sitwasyon, paano kamo nagapalig-unay sang imo bata?

Sang una kami nga gin-interogar, ginpahog kami sang mga imbestigador parte sa kon ano ang matabo sa akon kag sa akon bata kon indi ako magkooperar sa ila kag magpirma sang dokumento nga nagaaku nga may sala ako. Para paluyahon ang akon buot, ginplano nila nga “natabuan” nga magsugataay kami sang akon bata sa hallway sang investigation center. Sa banta ko, abi nila mabag-o ang akon desisyon kon mabalaka ako sa puede matabo sa akon bata kon indi ko pagsundon ang ila gusto. Pero baliskad ang natabo. Bisan kadali lang kami nga nagsugat-anay sang akon bata napalig-on namon kag napasalig ang isa kag isa nga buligan kami ni Jehova. Imbes nga mahadlok, nag-isog pa gid ako sang makita ko ang kompiansa kag determinasyon sang akon bata. Napakita ko sa ila nga bisan ano ang himuon nila sa amon, indi gid ako magpirma sa dokumento.

Svetlana Malyanova

Natawo: 1996 (Nizhny Novgorod)

Biograpiya: Mahilig sia sa mga binalaybay, magbasa, kag magkanta. Nagatudlo sia sang English kag French

Gintudluan sia sang iya tatay nga si Sergey parte kay Jehova halin sang bata pa sia. Nabawtismuhan sia sang 20 anyos sia sang 2016

Ang Iya Ginsiling

Paano napalig-on ang iban sa imo eksperiensia?

May anxiety disorder ako, gani sang gin-aresto ang mga kauturan, ginapamensar ko kon bala masarangan ko kon ako naman ang arestuhon. Sang natabo na ini, sang ginsulod na sang mga pulis ang akon balay, nangamuyo ako dayon. Nahibaluan ko nga sadto nga tion ang akon lang gid madangpan amo si Jehova. Bisan sang grabe nga pressure sa hunahuna bangod sang interogasyon, nabatas ko ini tanan sa bulig ni Jehova, kag bisan ako daw indi makapati nga nahimo ko ini. Kon kaisa may mga kauturan nga nagasiling: “Kon nasarangan gani ini ni Svetlana, masarangan ko man ini!”

Ang aton mga kauturan nga nagpabilin nga matutom bisan pa sang mga paghingabot nagapamatuod gid nga ang mga ‘nagasalig kay Jehova’ mangin ‘maisog kag mabakod.’—Salmo 27:14.

Time Line

Pebrero 7, 2019

Ginpasugtan sang isa ka judge ang mga pulis nga bantayan ang mga tawag sa telepono ni Sergey kag ang iban pa nga paagi sa pagkomunikar
Hulyo 16-17, 2019

Gin-raid sang mga pulis ang 31 ka pamilya sang mga Saksi ni Jehova sa Nizhny Novgorod kag sa Nizhny Novgorod Region. Si Oleg, si Sergey, kag si Svetlana gin-aresto kag gindala sa temporary detention center. Ginsugdan ang kaso batok sa ila
Hulyo 18, 2019

Gin-release sa detention center sanday Oleg, Sergey, kag Svetlana. Ginbutangan sang korte sing restriksion ang duha ka brother gani may tion nga indi sila makahalin sa ila balay, indi makakontak sa isa kag isa, ukon makagamit sang Internet
Agosto 24, 2021

Opisyal nga ginkasuhan si Roman nga nagaentra sa mga hilikuton sang isa ka extremist nga organisasyon kag ginbutangan sing restriksion ang iya pagbiyahe
Marso 3, 2022

Ginsugdan ang hearing

a b Wala sing available nga piktyur si Brother Roman Zhivolupov sa tion nga ginpagua ini nga artikulo.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE