Sa Disiembre 17, 2020, * ipahibalo sang Leninskiy District Court sang Rostov-on-Don ang desisyon sini sa kaso ni Brother Ruslan Alyev. Gusto sang piskal nga pamatbatan sang korte si Ruslan sing tatlo ka tuig nga suspended prison sentence.

Ruslan Alyev

• Natawo: 1987 (Chunoyar, Krasnoyarsk Territory)

• Biograpiya: Ang iya pamilya pirme lang nagasaylosaylo sing ilistaran sa Azerbaijan kag sa Ukraine. Nag-obra sia bilang builder kag salesman. Nagatudlo man sia magtokar sang gitara kag naga-tutor sa English kag Chinese. Mahilig sia sa sports, kag nanamian man sia magsulat sang mga binalaybay kag mga kanta. Kabalo sia maghambal sang apat ka lenguahe. Ang iya asawa nga si Kristina, kabalo man mag-Chinese

  Nagsugod sia sa pagbasa kag pagtuon sa Biblia sang 13 anyos sia. Samtang nagadugang ang iya natun-an, nakita niya nga ara sa Biblia ang sabat sa tanan niya nga pamangkot parte sa kabuhi. Bangod sini, nagdedikar sia kag nagpabawtismo sang 2006

Sang Hunyo 6, 2019, si Brother Ruslan Alyev ginpasakaan sing kaso kriminal nga amo ang rason sang pag-aresto sa iya sang Hunyo 10, 2019. Pagkatapos sang 24 ka oras sa detention center, si Ruslan kag ang isa pa ka brother nga si Semyon Baybak, gin-house arrest. Sang primero, walo lang ka semana ang kalawigon sang pag-house arrest kay Ruslan. Pero siam ka beses na ini nga ginpalawig, amo nga 18 ka bulan na sia nga naka-house arrest. Bangod sa iya sitwasyon, indi sia makapakig-upod sa kay bisan sin-o magluwas lang sa iya abogado, sa imbestigador, sa inspektor, kag sa iya asawa. Indi man sia makagamit sing Internet, kag indi man sia makabaton ukon makapadala sang sulat.

Si Ruslan nagsiling nga antes sia gin-aresto, pirme nila ginaistoryahan sang iya asawa nga si Kristina nga posible nga dali na lang gid matabo sa ila ini nga paghingabot. “Regular kami nga nagatuon sang Biblia, nagatambong sa mga miting, kag nagapangamuyo,” siling niya. “Naintiendihan namon kon ano ang puede matabo sa tion sang paghingabot kay nabasa namon ini sa aton mga Yearbook kag sa mga eksperiensia sang mga kauturan. Natun-an namon nga makakadlaw pa sila bisan daw ano kabudlay sang ila sitwasyon kag wala gid nagaluya ang ila buot.” Si Ruslan nagsiling pa gid: “Ginpangabay namon si Jehova nga hatagan kami sing kusog nga mabatas ang bisan ano man nga matabo sa palaabuton.”

Daku man ang nabulig sa akon kay pirme namon ginaistoryahan upod sa iban ang posible matabo nga paghingabot. “Gin-research ko ang makapaumpaw nga mga teksto sa Biblia kag ang makapalig-on nga mga artikulo para mabuligan ko nga magkalma ang mga kauturan sa kongregasyon kag mapalig-on sila. Kag sang ako naman ang nagakinahanglan sing paumpaw, ining mga teksto kag mga artikulo nga gin-research ko kag ginsaulo amo man ang nagpaumpaw sa akon.”

Ang paghanda ni Ruslan kag ni Kristina para sa paghingabot nakabulig gid sa ila. Samtang gina-raid ang ila balay, siling ni Ruslan: “Kalmado gid ako kag wala ako sing nabatyagan nga kabalaka.” Sang ginaimbestigar ako, ang imbestigador nagpamahog nga pasakaan man niya sing kaso si Kristina. “Wala gid ini nagpahadlok kay Kristina. Napalig-on gid ako kag napabakod sini,” siling ni Ruslan.

Madamo gid sing kabudlayan bangod sa pag-house arrest kay Ruslan. Pero si Ruslan nagsiling: “Pirme gid ginahatag ni Jehova ang aton kinahanglan para mabuhi kita, para padayon kita nga mangin malapit sa iya, kag para mangin kalmado kita. Ginapaabot ko gid ina. Nagasalig gid kami sa iya halin pa sang una kag nakabulig ini sa amon nga mangin kontento sa simple nga pagkabuhi. Gani wala gid kami nagakabalaka sing sobra.”

Sa isa sa mga hearing sa korte parte sa pagpalawig sang pag-house arrest kay Ruslan, wala ginpasugtan nga magsulod sa korte ang mga kauturan. Pero ang aton mga kauturan nagtipon sa gua sang korte kag nagpalakpak sang naggua sia, kag nagasinggit sila: “Ruslan, ari kami para suportahan ka!”

Nagapasalamat gid kita sa maayo nga halimbawa sang aton mga kauturan sa Russia. Bisan pa ginahingabot sila nga wala sing rason, padayon nila nga ginapakita ang ila bug-os nga pagsalig kay Jehova.—Salmo 118:6-9.