Sang Hunyo 22, 2021, ang Zavodskiy District Court of Kemerovo nagdesisyon nga guilty si Aleksandr kag si Sergey kag ginsentensiahan sila sing apat ka tuig nga suspended prison.

Aleksandr Bondarchuk

• Natawo: 1974 (Topki, Kemerovo Region)

• Biograpiya: Napatay ang iya amay sang 19 anyos sia. Nag-eskwela sia para makatuon sia magdrayb sang heavy equipment. Sang ulihi, nakatuon man sia mamanday. Subong nagapangkay-o sia sang mga blast furnace. Nanamian sia mangisda, mag-ski, mag-bike, kag magdalagan

• Napangasawa niya si Elena sang 1992. Si Elena ang una nga nagtuon sing Biblia upod sa mga Saksi ni Jehova. Sang gin-aplikar niya ang mga prinsipio sa Biblia, nangin maayo ang ila pag-asawahay. May duha sila ka bata nga lalaki

Sergey Yavushkin

• Natawo: 1960 (Rubtsovsk, Altai Territory)

• Biograpiya: Tinuig sia nga nagtrabaho bilang welder. Subong, nagapanghimo sia kag nagapangay-o sang mga kandado. Halin sang bata pa sia, mahilig na sia maggitara kag maghampang sing sarisari nga sports

• Napangasawa niya si Tatiana sang 1990. Wala madugay sa tapos sila ginkasal, nagtuon sila sing Biblia upod sa mga Saksi ni Jehova. Nanamian gid sila sa Biblia kay bisan madugay na ini nga libro, praktikal gihapon ang mga laygay sini subong. May duha sila ka bata, isa ka lalaki kag isa ka babayi

Sang Hulyo 22, 2019, alas seis sang aga, gin-raid liwat sang mga agent ang mga apartment nanday Brother Aleksandr Bondarchuk kag Brother Sergey Yavushkin. Pero sa sini nga tion, gin-aresto na sila nga duha, kag gin-interogar man ang ila mga asawa. Ginkompiskar man sang mga pulis ang ila mga gadyet.

Gin-detain si Aleksandr kag si Sergey sing duha ka adlaw. Dayon, nagdesisyon ang Central District Court nga i-house arrest sila sing duha ka bulan, pero anom ka beses na ini nga ginpalawig.

Sang gin-house arrest sila, indi sila puede maglampas sing 300 metros halin sa ila balay. Gani, indi sila makaobra. Pero antes sila ginpasakaan sing kaso, kilala gid ining duha ka brother sa ila mga lugar nga maayo nga mga tawo kag maayo nga mga trabahador. Gani, gintawgan sang ila mga amo ang mga nagaimbestigar sa ila kaso nga pasugtan sila nga makabiyahe. Wala ginpasugtan ang pangabay sang ila mga amo.

Nabatyagan ni Aleksandr kag sang iya pamilya ang pirme nga pagbulig ni Jehova. Bangod indi sia makaobra kag naka-freeze ang ila mga bank account, nagaproblema sila kon diin sila makuha sing kuarta para sa ila kinahanglanon. Pero nagsiling sia: “Bangod sini nga pagtilaw, natun-an ko nga magsalig pa gid kay Jehova. Sadto, daw indi ko matalupangdan nga ginabuligan ako ni Jehova, pero subong maathag gid sa akon nga ginabuligan ako ni Jehova kada oras. Wala niya gid kami ginpabay-an sang akon pamilya. Nabatyagan gid namon ang iya pagbulig kag pagpalangga.”

Bangod sa kaso kay Sergey, grabe gid ang iya stress kag kabalaka. Gani, na-stroke sia. Pero bisan pa sang iya sitwasyon, positibo lang sia gihapon. Nagsiling sia: “Bisan pa kon kaisa mabudlay batason ang mga nagakatabo sa aton kabuhi, dapat naton dumdumon nga ini nga mga kabudlayan temporaryo lang kag gagmay lang nga mga problema.”

Napalig-on gid si Sergey sa ginsiling sang 1 Corinto 15:58 nga ang aton “pagpangabudlay sa Ginuo indi wala sing pulos.” Nagsiling si Sergey: “Madumduman ni Jehova ang tanan, gani indi gid niya malipatan ang maayo naton nga mga hinimuan.”

Ginapangamuyo naton ang aton mga kauturan sa Russia nga tinuig na nga ginahingabot. Kabay nga padayon sila nga mapalig-on kag mapaumpawan sang Pulong sang Dios, nga nagasiling: “Nagakalipay si Jehova sa mga nagakahadlok sa iya, sa mga nagahulat sang iya mainunungon nga gugma.”—Salmo 147:11.