Sang Abril 1, 2021, may ginhiwat nga press conference sa Moscow parte sa ika-70 nga anibersaryo sang Operation North. Ang Operation North amo ang pag-deport sa halos 10,000 ka mga Saksi ni Jehova halin sa anom ka republika sadto sang Soviet pakadto sa Siberia sakay sa tren. Natabo ini sang 1951. May gin-imbitar nga anom ka humalambal kag ang pila sa ila mga scholar kag mga human rights specialist. Ginsabat man nila ang mga pamangkot sang mga reporter kag mga journalist. Gin-istorya sang mga humalambal ang natabo sadto sa Operation North kag ang koneksion sini sa paghingabot nga nagakatabo subong sa Russia. Gin-broadcast sing live sa Internet ini nga press conference.

Gin-istorya ni Yaroslav Sivulsky, isa ka representante sang European Association sang mga Saksi ni Jehova, ang natabo sadto sa Operation North. Ang iya mismo pamilya nalakip sa mga gin-deport sa Siberia. Madamo sia sing gin-istorya parte sa kapintas kag pag-antos nga naeksperiensiahan sang mga gin-deport. “Sang gintan-aw namon ang mga rekord parte sa sini nga hitabo, nakumpirmar namon nga 9,793 ka mga Saksi ni Jehova upod sa ila pamilya ang gin-deport,” siling ni Sivulsky. “Nalakip sa sini ang mga napatay kag mga ginbun-ag samtang nagabiyahe sila.”

Si Sergey Ivanenko isa ka Russian kag ginatun-an niya ang mga relihion. Gin-istorya niya nga may daku nga papel ang propaganda sang Soviet para pakalainon ang mga Saksi ni Jehova sa sining Operation North, kag nagsiling man sia nga may propaganda gihapon nga nagakatabo sa Russia para pakalainon ang mga Saksi ni Jehova amo nga ginahingabot sila. Base sa iya pagtuon, ginsugid ni Ivanenko nga malig-on gid ang mga Saksi ni Jehova. Nagsiling sia: “Ang mapintas nga paghingabot sang gobierno sa mga Saksi ni Jehova nga nagakatabo sa Russian Federation sugod pa sang 2017, wala gid sing pulos. Ang mga Saksi nga nagbatas sa Operation North kag ang mga Saksi ni Jehova subong sa Russia nga malig-on gid sa ila pagtuo, nagapamatuod nga wala gid sing pulos ang pagtinguha nga pauntaton sila sa ila pagsimba sa Dios. Gani para sa kaayuhan sang tanan, maayo gid kon untatan na sang Russia ang pag-ban sa mga Saksi ni Jehova kag sa ila mga hilikuton.”

Si Artur Artemyev, isa man sa mga nagatuon sang relihion kag sia ang awtor sang Jehovah’s Witnesses in Kazakhstan: A Social-Historical and Religious Analysis (gin-revise sang 2020). Suno sa iya ginpabudlayan gid sang grabe sang Soviet ang mga Saksi ni Jehova. Ginhimo nila ini para paluyahon ang pagtuo sang mga Saksi ni Jehova kag papason sila. Pero wala gid sila nagmadinalag-on. Sa baylo, suno sa iya, sang panahon sang paggahom sang Soviet mas nagdamo pa gid ang mga Saksi ni Jehova sa ila pungsod. Amo man sini ang ginsiling ni Valery Borschev sang Moscow Helsinki Group kag isa ka human rights specialist: “Kon hingabuton mo ang mga Saksi ni Jehova mas nagabakod pa gid sila. Dapat ina maintiendihan sang mga ara sa gobierno.”

Ginbinagbinag ni Valentin Gefter, isa ka miembro sang Expert Council sang Commissioner for Human Rights sa Russia, ang topiko nga “Kon Paano Nagdamo ang mga Ginapriso sa Russia Bangod sa Konsiensia.” Ang mga Saksi nga ginpriso sa Russia wala napriso bangod may gindampigan sila sa pulitika, kundi napriso sila bangod ang ila konsiensia indi magsugot nga himuon ang isa ka butang. Nagsiling sia: “Wala ginakontra sang mga Saksi ni Jehova ang gobierno.” Ginpaathag pa gid niya kon ngaa wala nagaentra sa pulitika ang mga Saksi ni Jehova. Nagsiling sia nga bangod ini sa ila mga ginapatihan. Amo ini ang rason kon ngaa ginapriso sila sang gobierno. Kag suno sa iya indi gid ini nagakaigo kag indi makatarunganon.

Ang katapusan nga humalambal amo si Aleksandr Verkhovsky. Miembro sia sang Presidential Human Rights Council kag direktor sang SOVA Center for Information and Analysis. Ginatun-an sing maayo kag ginaisaisa sang SOVA Center ang tanan nga kaso sang indi nagakaigo nga pagpatuman sang extremism law, lakip ang ginahimo sa mga Saksi ni Jehova. Ginsugid niya ang iya opinyon parte sa paghingabot nga ginahimo sang Russia. “Mauntat bala ang paghingabot sa mga Saksi? Importante gid ini nga pamangkot, kag wala kami kabalo sang sabat sa sini.” Nagapati si Verkhovsky nga dapat na gilayon untatan sang gobierno sang Russia ang paghingabot sa mga Saksi ni Jehova. May ginhatag sia nga mga panugda para sa mga manughimo sing kasuguan kon paano nila mabag-o ang anti-extremism law. Paagi sa sini mas masigurado nga maproteksionan ang Estado kontra sa matuod gid nga mga extremist. Malikawan man nga madalahig ang mga tumuluo nga nagakabuhi sing malinong kag indi malapas ang ila mga kinamatarong, pareho sang mga Saksi ni Jehova.

Ginhatagan sing tsansa ang mga journalist nga makapamangkot sa mga humalambal.

Sina nga adlaw, may ginhiwat man nga academic conference sa siudad sang Chisinau, Moldova. Gin-organisar ini sang Institute of History of the Academy of Sciences of Moldova, sang Alecu Russo State University of Balti, kag sang Bogdan Petriceicu Hasdeu State University of Cahul. May isa pa gid ka conference nga hiwaton sa Ukraine sa Abril 9.