AGOSTO 2, 2022
RUSSIA

Proud nga Nangin “Bahin sang Kasaysayan sang Organisasyon”

I-PLAY

Sang Hulyo 26, 2022, nagdesisyon ang Snezhinskiy City Court of the Chelyabinsk Region nga guilty si Brother Ilya Olenin. Gusto sang piskal nga prisuhon sia sing anom ka tuig kag tunga. Pero nagdesisyon ang korte nga imbes prisuhon, multahan sia sang 500,000 ka rubles ($8,150 U.S.).

Time Line

Abril 17, 2017

Ginpauntat sang mga agent sang FSB ang selebrasyon sang Memoryal nga ginahiwat kada tuig. Ginkasuhan si Ilya nga “nagahimo sang hilikuton sang isa ka misyonero,” pero gin-dismiss ang kaso
Nobiembre 30, 2020

Gin-raid ang iya balay
Septiembre 8, 2021

Ginsugdan ang kaso
Oktubre 27, 2021

Gin-raid liwat ang iya balay. Gindala sia para interogahon kag ginbutangan sang restriksion ang iya pagbiyahe
Mayo 23, 2022

Ginsugdan ang hearing

Impormasyon Parte sa Iya

Ilya Olenin

Natawo: 1977 (Chelyabinsk, Chelyabinsk Region)

Biograpiya: Nanamian sia mag-entra sa sports sang bata pa sia. Sang 1993, naaksidente sing grabe ang ila pamilya, amo nga nagtener sia sing dugay sa ospital. Nagaobra sia bilang aerospace engineer

Pagkatapos sang aksidente, ginapaligban niya kon ano ang pulos sang kabuhi kag nagsugod sia sa pagbasa sang Biblia. Naistorya niya ang mga Saksi ni Jehova sang 1998. Ang pagkamakatarunganon sang Biblia nagkumbinsi sa iya nga amo ini ang pinakamaayo nga giya. Nabawtismuhan sia sang 2006

Napangasawa niya si Natalya sang 2015. May tatlo sila ka bata

Ang Iya Ginsiling

Ano ang ginabatyag mo sa paghingabot nga imo naeksperiensiahan?

Para sa akon, isa ka pribilehiyo nga hingabuton. Nangin bahin ako sang kasaysayan sang organisasyon subong. Pero may responsibilidad nga upod ini nga pribilehiyo. Daw pareho lang nga si Jehova nagaentra man sa kaso sa korte, kag ginhatag niya sa akon ang kahigayunan nga depensahan ang iya ngalan. Gani, nangin mas hugot pa gid kag detalyado ang akon mga pangamuyo.

Sa ano nga mga kahigayunan nga nakapanaksi ka sa tion sang hearing?

Kon mag-istorya ako sa imbestigador, pirme ko gid ginasugid sa iya ang aton mga ginapatihan. Sang ulihi, ginapamangkot na niya ako sang mga topiko sa Biblia. Sa amon katapusan nga pagkitaay, napensar ko nga basi indi na kami makakitaay liwat, gani ginhambalan ko sia nga tun-an man niya ang Biblia. Nakibot ako sang nagsiling sia nga tinguhaan niya nga himuon ina. Ginpamangkot pa gani niya ako kon ano nga topiko ang iya unahon nga tun-an!

Ang isa pa gid amo ang abogado nga gin-asayn sang korte sa akon. Sa akon ikaduha nga hearing, ining babayi nga abogado nagdala sa korte sang Biblia nga leather ang putos, may gold nga rebiti sa kilid, kag may naka-emboss nga metal sa kober. Ginpamangkot niya ako kon diin nga teksto mabasa ang ngalan sang Dios. Sa hearing, ginpangabay sang akon abogado ang isa ka witness sang prosecution kag ginpabasa sa iya ang Exodo 15:3. Dungan nila nga ginbasa sing mabaskog ang teksto. Gani nakita sang judge kag sang piskal ang ngalan sang Dios sa Biblia.

Proud gid kita kay Ilya kag sa tanan naton nga pinalangga nga mga kauturan nga matutom nga nagakabuhi suno sa aton ngalan. Mga saksi sila, nga nagapanaksi para sa aton halangdon nga Dios nga si Jehova.—Isaias 43:10.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE