Pulo ka tuig na ang nagligad sugod sang Hunyo 10, 2010, sang nagdesisyon ang European Court of Human Rights (ECHR) nga ang mga awtoridad sa Russia nakahimo sing mabug-at nga paglapas sa mga kinamatarong sang tawo. Kay sa sulod sang mga tinuig, nagapanikasog gid sila nga pauntaton ang pagsimba sang mga Saksi ni Jehova. Ginmanduan sang ECHR ang Russia nga bayaran sing daku nga danyos ang mga Saksi kag irehistro liwat ang Local Religious Organization sang mga Saksi ni Jehova sa Moscow, nga ginkuha sa ila sang 2004.

Pagkatapos napahibalo ang desisyon sang ECHR, si Brother Ivan Chaykovskiy, nga tsirman sadto sang Moscow Community of Jehovah’s Witnesses, nagsiling: “Ini nga desisyon nagapakita nga nagdaug ang pagkamakatarunganon sangsa diskriminasyon sang relihion. Kabay nga paagi sa sini nga desisyon, ibalik na sa amon ang amon legal nga mga kinamatarong kag untaton na sang gobierno ang paghingabot sa mga Saksi ni Jehova sa bilog nga pungsod.”

Pero wala gid ini natabo kay ginbalewala lang sang Russia ang mando sang ECHR kag mas ginpabaskog pa gid nila ang ila paghingabot sa aton mga kauturan sa bilog nga pungsod. Naglala pa gid ini sang nagdesisyon ang Supreme Court sang Russia sang 2017 nga i-ban ang aton mahidaiton nga pagsimba, amo nga madamo sa aton mga kauturan ang gin-aresto, ginkasuhan, kag ginpriso.

Bisan pa nagligad na ang pulo ka tuig, ang kalabanan sa desisyon sang Korte batok sa Russia importante gihapon. Sang 2010, ginbasura sang ECHR ang madamo nga sala nga panumbungon nga padayon nga ginapasaka sang Russia batok sa aton mahidaiton nga mga kauturan asta subong.

Bilang pagsumaryo, ang ECHR nagsiling nga ang Moscow Justice Department kag ang mga korte sa Moscow wala sing “legal nga basihan” para indi pag-irehistro liwat ang mga Saksi ni Jehova. Ginkondenar sang Korte ang mga awtoridad sa Moscow, kag nagsiling nga “obligasyon kuntani nila nga mangin neutral kag patas pero wala gid nila ini ginhimo.” Dugang pa, ginlapas man sang mga awtoridad sa Moscow ang European Convention on Human Rights, bisan pa nagsugot ang Russia nga sundon ini.

Subong nga tuig, pareho sang 2010, kabalo ang bilog nga kalibutan parte sa paghingabot sang Russia batok sa aton mga kauturan. “Kon Saksi ni Jehova ka sa Russia kag ginahimo mo ang mga hilikuton sang imo relihion, ginarisgo mo ang imo kahilwayan,” siling ni Rachel Denber, nga isa ka opisyal sang Human Rights Watch para sa Europe kag Central Asia. Sa isa ka pahayag sang Enero 9, 2020, nagsiling sia: “Dapat wala ini nagakatabo.”

Ginapangamuyo naton nga padayon nga pabakuron ni Jehova ang aton mga kauturan nga ginahingabot sa Russia para ‘makabatas sila sing bug-os nga may pagpailob kag kalipay.’—Colosas 1:11.