Subong, ginsugdan sang Supreme Court of the Russian Federation ang pagrebyu sa madamo nga file sang kaso—43 ka volume sang dokumento. Gintugutan man ang mga abogado sang Administrative Center (Center) nga magpresentar sang bag-o nga ebidensia sang pag-raid sa relihioso nga mga pagtilipon sang mga Saksi ni Jehova. Sang Marso kag Abril 2017, gingamo sang mga pulis ang relihioso nga mga pagtilipon kag ginpahog nila ang mga tumalambong nga pasakaan sila sing kaso-kriminal.

Para mabinagbinag ang ginpasaka nga kaso sang Ministry of Justice (Ministry) nga ipasira ang 395 ka legal nga korporasyon (Local Religious Organizations ukon LROs), ginpamatian sang Korte ang argumento parte sa legalidad sang mga Saksi ni Jehova kag pagkilala sa ila. Sang ginrebyu ang una nga mga desisyon parte sa pagdumili sa walo ka LRO, ginpakita sang mga abogado sang mga Saksi nga yadto nga mga desisyon nabase sa himuhimo nga ebidensia kag sa sala nga proseso.

Dugang pa, ginpakita man sang mga abogado sang Center nga duha ang talaksan sang Ministry. Sa tion sang pagbista para ipasira ang mga LRO, ang Ministry nagsiling nga ang Center wala sing labot sa ginahimo sang mga LRO. Ginpunggan man sini ang panikasog sang Center nga makigbahin samtang ginakaso ang mga LRO. Pero sa subong, ang Ministry nagsiling nga ang Center kinahanglan manabat sa alegasyon nga ang mga LRO may ginahimo nga supak sa kasuguan kag may salabton man sila sa mga publikasyon sang mga Saksi nga “batok sa gobierno.”

Madamo nga beses nga gin-inspeksion sang Ministry ang legal nga mga korporasyon sang mga Saksi kag ginsumiter nila sa Korte ang pila ka volume sang ila report parte sa inspeksion. Pero sang ginpamangkot sila, indi makahatag ang Ministry sing bisan isa ka pamatuod nga ang mga Saksi nakahimo sing hilikuton nga batok sa gobierno.

Ang Korte magapadayon sang hearing sa Abril 20, 2017, sa alas 2 sang hapon.