ENERO 20, 2022
RUSSIA

Sa Siudad sang Karpinsk, ang Aton mga Kauturan Nagsalig kay Jehova kag Nagbakod Gid ang Ila Pagtuo

I-PLAY

Sa indi madugay, ipahibalo sang Karpinsk City Court of the Sverdlovsk Region ang desisyon sini sa kaso ni Sister Darya Dulova, ni Sister Venera Dulova, ni Brother Aleksandr Prianikov kag sang iya asawa nga si Sister Anastasiya Prianikova, kag ni Sister Svetlana Zalyaeva. Wala pa sing may ginsiling ang piskal kon ano nga sentensia ang gusto niya sa sini nga kaso

Time Line

Enero 27, 2020

Sanday Aleksandr, Darya, kag Venera ginsentensiahan nga guilty sa lain nga kaso batok sa ila
Pebrero 2020

Ginpasakaan sang ikaduha nga kaso sanday Aleksandr, Darya, kag Venera
Marso 30, 2020

Gin-raid sang mga awtoridad ang mga balay sang mga ginkasuhan kag ginkompiskar nila ang mga gadyet
Mayo 19, 2020

Sanday Anastasiya kag Svetlana ginlakip sa sini man nga kaso. Ginmanduan sila nga duha nga indi maghalin sa ila lugar
Abril 29, 2021

Nag-umpisa ang pag-hearing

Impormasyon Parte sa Ila

Venera Dulova

Natawo: 1968 (Karpinsk, Sverdlovsk Region)

Biograpiya: Ginpadaku sia sang iya iloy kag lola. Nanamian sia mag-knit, magbasa, kag magtuon. Napatay ang iya iloy kag lola antes sia mag-17 anyos. Nagpamana sia sang 1990. May tatlo sia ka kabataan

Nagpalibog sia sadto kon ngaa nagakapatay kita kag mangin ano ang palaabuton sang iya kabataan. Nagtuon sia upod sa mga Saksi ni Jehova sang 28 anyos sia. Nabawtismuhan sia sang 1998

Ang Iya Ginsiling

Paano ka ginbuligan ni Jehova sa sini na tion?

Ang akon mga paryente kag ang akon bana nga nagapamatok sadto mabuot na subong sa akon. Ginadayaw pa gani ako sang akon bana kag ginapalig-on ako nga indi mangampo. . . . Ginabuligan kami ni Jehova paagi sa mainayuhon nga mensahe sang mga kauturan sa kongregasyon.

Pagkatapos sang una nga pag-raid, ang una ko nga ginpamensar amo nga: ‘May kaso ako, imposible ini! Hinadlukan gid ako! Pero nagsiling ang akon abyan nga mas maayo nga ang pensaron ko, ‘Nagdaug ako, pareho kay Jesus.’

Aleksandr Prianikov

Natawo: 1987 (Udinsk, Khabarovsk Territory)

Biograpiya: Mahilig sia sa music. Kabalo sia mag-accordion. Nag-obra sia bilang electrician sa isa ka factory. Subong nagahimo sia sang mga decorative tiles

Nagapati sia halin pa sadto nga may Dios. Nanamian gid sia sa promisa sang Dios nga indi na mapatay ang mga tawo. Nabawtismuhan sia sang 2004. Napangasawa niya si Anastasiya sang 2011

Ang Iya Ginsiling

Paano kamo ginpalig-on sang mga kauturan sang ginkasuhan kamo?

Ginbuligan kami sang isa ka utod nga pensaron ang Salmo 139:1. Nagsiling sia nga “palangga gid kamo ni Jehova amo nga nahibaluan niya ang tanan ninyo nga ginahunahuna, ginabatyag, ginahambal, kag ginahimo. . . . Nahibaluan ni Hari David nga nagaulikid gid si Jehova sa kada isa sa aton. . . . Nakita niya ang tanan nga naeksperiensiahan naton sa aton kabuhi kag ang epekto sini sa aton. Indi gid kita dapat magbatyag nga nagaisahanon kita.” Nalipay gid ako sini. Nabatyagan ko nga kaupod ko si Jehova kada adlaw.

Anastasiya Prianikova

Natawo: 1987 (Karpinsk, Sverdlovsk Region)

Biograpiya: Sia kag ang iya magulang nga lalaki ginpadaku sang ila iloy. Nanamian sia magkanta kag magpanahi

Nanamian sia sa promisa sang Dios nga paghidait sa palaabuton. Nakita niya nga ang Biblia nagaunod sang praktikal kag maalamon nga panuytoy. Nabawtismuhan sia sang 2002. Napamana niya si Aleksandr sang 2011

Ang Iya Ginsiling

Paano nagbakod ang imo kaangtanan kay Jehova sang ginkasuhan kamo?

Nagbakod gid ang akon pagtuo sa sulod sang halos tatlo ka tuig nga ginkasuhan kami. Nagdugang pa gid ang pagsalig ko kay Jehova. Nahangpan ko nga kontrolado ni Jehova ang tanan nga butang. Kon kaisa, kon nagabatyag kami nga indi na kami makabatas, may ginahatag gid sia nga bulig para makabatas kami. Natalupangdan ko man nga kon maggrabe ang paghingabot, mas gusto ko pa gid nga alagaron si Jehova.

Samtang nagapadayon ang paghingabot sa aton mga kauturan sa Russia, napalig-on man ang aton pagtuo kay nakita naton nga ginapalangga kag ginabuligan sila ni Jehova. Ang ila natilawan nga pagtuo nagaresulta sa “kadayawan, himaya, kag kadungganan” sang ngalan ni Jehova.—1 Pedro 1:7.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE