Sang Agosto 28, 2021, sa tapos sang pangabay sang European Court of Human Rights (ECHR) sa awtoridad sang Russia, ginpagua na si Brother Aleksandr Lubin kag si Brother Anatoliy Isakov sa pretrial detention. Dis-ebol ining duha ka brother bangod sa ila balatian. Pero bisan pa sini, gin-detain sila gihapon sa Kurgan Region sa Russia sing isa ka bulan kag tunga. Depende sa desisyon sang korte sa ila kaso, posible sila gihapon mapriso.

Sang Hulyo 13 kag 14, 2021, ginpanghalughog sang mga awtoridad sa Kurgan Region ang mga balay sang mga Saksi ni Jehova. Si Brother Isakov nga 56 anyos, kag si Brother Lubin nga 65 anyos, nalakip sa mga Saksi nga gindala para prisuhon.

Si Brother Lubin may malubha nga vascular disease, hypertension, kag autoimmune disease. Bangod sini naapektuhan ang pila ka organ sang iya lawas. Kinahanglan niya i-oxygen sing 16 ka oras kada adlaw kag kinahanglan man niya magpadoktor pirme. Pero wala sia ginpasugtan nga himuon ini. Nabudlayan sia maglakat kag indi sia makatindog kon indi sia pagbuligan sang iban. Ang iya asawa nga si Tatyana dis-ebol man kag apat na ka bes nga na-stroke.

Si Brother Isakov may cancer sa dugo kag may pila sia ka bali sa iya taludtod kag gusok, amo nga kinahanglan niya maggamit sing wheelchair. Bangod ginpriso sia, wala na niya napadayon ang iya chemotherapy. Wala man sia ginahatagan sing bulong para sa pagpalanakit sang lawas. Ang masubo kay na-COVID pa gid si Brother Isakov sang ara sia sa pretrial detention center.

Sinemana man nga nag-apelar sa korte ang mga abogado nga paguaon sa detention center ang duha ka brother, pero wala ginpasugtan ang ila pangabay. Sa baylo, ginbase sang mga judge ang ila desisyon sa isa ka certificate halin sa mga doktor sa Kurgan Regional Clinical Hospital. Nagsiling ini nga mga doktor nga ang balatian ni Brother Lubin kag ni Brother Isakov, indi rason para indi sila pag-ibutang sa pretrial detention.

Sang Agosto 8, 2021, nagpadala sing reklamo ang mga abogado sa ECHR. Gani, nagpangabay ang ECHR sa General Prosecutor’s Office of the Russian Federation. Sang Agosto 24, 2021, gindala ang duha ka brother sa Kurgan Regional Clinical Hospital. Sa sini nga tion, nagsiling na ang mga doktor nga may balatian si Brother Lubin kag si Brother Isakov amo nga indi sila dapat pag-ibutang sa detention center.

Ginapangamuyo naton nga kabay nga padayon nga mangin matutom ining duha ka brother bisan ginahingabot sila kag may balatian. Kabalo kita nga padayon nga ‘ipakita ni Jehova ang iya kusog’ para sa ila.—2 Cronica 16:9.