Sa indi madugay, ipahibalo sang Neftekumskiy District Court of the Stavropol Territory ang desisyon sini sa kaso nanday Brother Aleksandr Akopov, Brother Konstantin Samsonov, kag Brother Shamil Sultanov. a Wala pa sing may ginsiling ang piskal kon ano nga sentensia ang gusto niya sa sini nga kaso.

Aleksandr Akopov

• Natawo: 1992 (Neftekumsk)

• Biograpiya: Nag-obra sia sa konstruksion upod sa iya tatay kag magulang nga lalaki. Nanamian sia mag-soccer, mag-basketball, mag-tennis, maglagawlagaw sa gua, kag magluto

  Nabawtismuhan sia bilang isa sa mga Saksi ni Jehova sang 2007 sang 14 anyos sia

Konstantin Samsonov

• Natawo: 1977 (Neftekumsk)

• Biograpiya: Sang pamatan-on sia, interesado gid sia nga makatuon sing chess kag computer technology. Nagaobra sia subong bilang isa ka systems engineer sa isa ka ospital. Sia kag ang iya asawa nga si Svetlana nagtuon sing Biblia upod sa mga Saksi ni Jehova sang 1998. Nabawtismuhan sila sang tuig 2000. May isa sila ka bata nga lalaki

Shamil Sultanov

• Natawo: 1977 (Mahmud-Mekteb, Stavropol Territory)

• Biograpiya: Nagamentinar kag nagapangay-o sang mga bilding. Sang mga tuig 2000, nagtuon sia sing Biblia upod sa mga Saksi ni Jehova. Nabawtismuhan sia sang 2003. Napangasawa niya si Elena sang 2004. Ginpadaku nila ang bata nga lalaki ni Elena sa iya una nga bana

Sang Sabado, Agosto 26, 2017, ginpalibutan sang armado nga mga pulis ang 18 ka Saksi ni Jehova nga nagabakasyon sa isa ka linaw malapit sa Neftekumsk. Ini nga grupo, nga may upod nga mga bata kag mga tigulang, ginpasakay sa bus kag gindala sa isa ka presinto kag gin-interogar sing tatlo ka oras. Dayon, ginpanilagan sang mga pulis ang hulag sang madamo nga kauturan sa Neftekumsk kag gin-raid ang ila mga balay. Gin-aresto sanday Aleksandr, Konstantin, kag Shamil kag halos isa ka tuig sila sa pretrial detention.

Si Aleksandr nagsiling nga nahadlok sia nga mapriso bangod grabe sa iya ka mabinalak-on kag may mga ginabatyag pa sia sa iya lawas. Gani nagpakitluoy sia kay Jehova nga hatagan sia sing mabakod nga buot kag malinong nga panghunahuna samtang ara sia prisuhan. “Pirme ko lang ginahambal kay Jehova nga daw indi ko na gid maagwanta ang prisuhan,” siling ni Aleksandr. “Daw indi ako makapati nga nabatas ko ang [halos] isa ka tuig sa detention center.” Ginsabat ni Jehova ang iya mga pangamuyo. Sang wala sia sing Biblia, ginbuligan sia ni Jehova nga madumduman ang mga teksto. Ginasulat niya ang kada teksto nga madumduman niya, kag kada aga nagabasa sia sing isa ka teksto kag ginabinagbinag kon paano ini makabulig sa iya sitwasyon. Nakabulig ini sa iya nga maintiendihan ang nagakatabo sa iya base sa pagtamod ni Jehova.

Nakabulig kay Konstantin nga mangin mas maisog ang madamo nga sulat sang iya asawa sa iya. Nadumduman niya nga sa isa ka sulat, nagsiling ang iya asawa nga kabigon niya nga adventure ang mga pagtilaw sa iya. “Daw makahalam-ot ini, pero amat-amat ko nga nabatyagan nga wala na ako gawa ginabudlayan,” siling ni Konstantin.

Si Shamil nagsiling nga ginbudlayan gid sia sa una nga pila ka bulan sa pretrial detention center. “Nag-ayuayo man ang sitwasyon sang ulihi,” siling ni Shamil. “Pamatuod ini nga wala gid ako ginpabay-an.” Sa sini nga tion, natun-an niya nga magsalig kay Jehova kag indi gid pagkabalak-an ang mga pagtilaw nga mahimo mag-abot sa ulihi.

Ining tatlo ka brother wala pa gihapon ginpasugtan nga makabiyahe kag indi man sila makagamit sang telepono ukon Internet. Bangod sini, nabudlayan si Aleksandr nga magpadoktor kag indi man makaobra si Konstantin bilang computer programmer. Bisan pa sa sini nga mga kabudlayan, determinado ining tatlo ka brother nga mangin matutom sa ila Dios.

Kabalo kita nga pakamaayuhon ni Jehova ini nga mga brother samtang padayon sila nga nagasalig sa iya.—Salmo 20:7.