Albert Batchaev

• Natawo: 1976 (Karachayevsk)

• Biograpiya: May tatlo sia ka utod nga babayi kag isa ka utod nga lalaki. Napatay na ang iya iloy kag sia ang nagaatipan sa iya tigulang na nga amay. Isa sia ka abogado sa military school kag opisyal sang mga soldado nga nagaimbestigar sang mga krimen

  Nagtuon sia sing Biblia kag nakumbinsi sia nga amo ini ang kamatuoran. Ginbawtismuhan sia bilang isa sa mga Saksi ni Jehova sang 2004. Napangasawa niya si Zhanna sang 2007. Subong ang iya obra amo ang pagpangtakod sang mga puertahan. Pero, indi gid sia makaobra todo bangod sang iya ginabatyag sa panglawas. Nanamian sila nga mag-asawa magbiyahe kag magkadto sa mga kabukiran malapit sa ila lugar

Sang Disiembre 16, 2019, gin-raid sang mga agent sang Federal Security Service (FSB) ang sobra pulo ka balay sa siudad sang Cherkessk. Pagkatapos sini, madamo nga kauturan ang gindala nila.

Pagkadason nga adlaw, ginbuy-an nila ang tanan nga kauturan magluwas lang kay Brother Albert Batchaev. Ginbutang nila sia sa isa ka detention center sa sulod sang masobra 72 ka oras kag ginkasuhan bangod kuno sa iya pagpanguna sa pagkanta kag pagpangamuyo kay Jehova. Sang makasuhan na sia, nagreport ang iya mga kakilala kag mga abyan nga ginapanilagan sila sang mga awtoridad.

“Sang ginpasulod nila ako sa detention center kag sang ginsira na nila ang mabug-at nga salsalon nga puertahan sang selda, mabatian ko ang pag-igot sini kag ang pagtunog sang kadena. Naglalain gid ako,” siling ni Albert. “Abi ko indi na gid ako makagua didto, nga didto na ako mapatay. Grabe gid ang kabalaka ko sa akon asawa kag sa mga kauturan.”

Halos duha ka bulan si Albert sa pretrial detention kag dayon gin-house arrest sia. Pero pagligad lang sang isa ka semana, ginbutang sia liwat sa pretrial detention sa sulod sang pito ka semana. Si Albert nagsiling: “Sang sa prisuhan ako kag nagaisahanon, naintiendihan ko gid kon ngaa importante ang regular nga pagsimba kay Jehova kag mangin masako sa pag-alagad sa iya. Nakabulig gid ini para indi magluya ang akon pagtuo, pagbatas, paglaum, kag gugma kay Jehova kag sa mga tawo.”

May nakuha sia nga Biblia bisan laka lang nga may ara sini sa prisuhan. Si Albert nagsiling: “Nabuligan gid ako sang Biblia nga makabatas, indi madulaan sing paglaum, kag mabatuan ang kahidlaw sa akon mga pinalangga.” Mas naintiendihan na subong ni Albert ang matutom nga mga tawo nga narekord sa Biblia nga nakaeksperiensia sing grabe nga kabudlayan kag napriso man. Nagsiling sia: “Sang napriso ako, nabatyagan ko nga matuod gid sila, nagkabuhi sila, kag suod ako sa ila. Gani pamatyag ko madamo ako sing mga abyan indi lang subong kundi bisan ang mga nagkabuhi sadto.”

Sang Abril 2020, nagdesisyon ang korte nga i-house arrest na lang si Albert sa sulod sang duha ka bulan. Pero apat ka beses na ini nga gin-extend. Gin-extend ini liwat sang katapusan nga mga inadlaw sang Marso kag nakaiskedyul nga matapos sa katapusan sang Hunyo 2021.

Kabalo kita nga padayon nga pabakuron kag atipanon ni Jehova si Brother Batchaev kag ang tanan Niya nga matutom nga mga alagad nga ginahingabot.—1 Cronica 29:12.