Sang Huebes, Hulyo 4, 2019, ginpahibalo sang Ordzhonikidzevskiy District Court sa siudad sang Perm’ sa Russia ang pamatbat sini nga si Brother Aleksandr Solovyev nakasala kag ginmultahan sia sing 4,731 U.S. dolyares.

Si Brother Solovyev gin-aresto sang gab-i sang Mayo 22, 2018, sa isa ka estasyon sang tren pag-abot niya halin sa iban nga pungsod upod sa iya asawa nga si Anna. Ginposasan sang mga pulis si Brother Solovyev kag ginbutang anay sa isa ka temporaryo nga prisuhan. Si Sister Solovyev gindala man sang mga pulis pero sa lain pa gid nga salakyan nga indi upod sa iya bana. Bilog nga gab-i nga ginhalughog sang mga pulis ang ila apartment—ginkuha ang ila mga retrato, mga gadyet, kag pila ka Biblia.

Pagkatapos gin-interogar si Sister Solovyev ginbuy-an sia kag wala ginpasakaan sang kaso. Pero, si Brother Solovyev ginpasakaan sang kaso kriminal, kag sang Mayo 24, gin-house arrest sia asta sang Nobiembre 19, 2018. Samtang nagahulat sang pagbista sa iya, ginlimitehan sang mga awtoridad ang iya kahilwayan.

Iapelar sang mga abogado ni Brother Solovyev ang pamatbat batok sa iya. Nagpasaka man sila sing aplikasyon sa United Nations Working Group Against Arbitrary Detention.

Bisan pa nagagrabe ang paghingabot sa mga lugar pareho sang sa Russia, ‘wala kita nahadlok’ sa aton mga kaaway. Nagasalig kita nga padayon nga iaman ni Jehova ang tanan naton nga kinahanglan para makabatas kita asta sa pag-abot sang iya dakung adlaw sang pagluwas sa aton.—Filipos 1:28