Sang Septiembre 2, 2021, gin-deny sang Amur Regional Court ang pag-apelar ni Aleksey kag ni Dmitriy. Amo gihapon ang sentensia kay Aleksey, pero nagdesisyon ang korte nga buhinan sing pulo ka bulan ang sentensia kay Dmitriy. Ginsaylo na sila nga duha sa prisuhan halin sa pretrial detention.

Sang Hunyo 30, 2021, ginsentensiahan sang Blagoveshchensk City Court of the Amur Region si Aleksey nga mapriso sing walo ka tuig kag si Dmitriy naman sing pito ka tuig. Antes sini, ang pinakamalawig nga sentensia sa isa sa mga Saksi ni Jehova sa Russia sugod sang gin-ban ang organisasyon sang 2017, pito ka tuig kag tunga nga pagkapriso. Halin sa korte, gindala nila dayon ang duha ka brother.

Aleksey Berchuk

• Natawo: 1975 (Kartaly, Chelyabinsk Region)

• Biograpiya: Nagtrabaho sia sa konstruksion kag pagpamanday. Nagtuon sia sing Biblia sang dekada ’90. Gin-untatan niya ang paghampang sing mapintas nga sports kag nanamian na sia maghampang sing soccer upod sa iya mga abyan. Nabawtismuhan sang 1998. Napangasawa niya si Anna sang 2008

Dmitriy Golik

• Natawo: 1987 (Tokhoy, Republic of Buryatia)

• Biograpiya: Nagatrabaho sia bilang translator sang Chinese-pa-Russian. Nanamian sia mag-weight training, mag-soccer, kag maggitara

  Nagtuon sing Biblia ang bilog niya nga pamilya sang dekada ’90. Nabawtismuhan sia sang 2002. Sang ginpatawag sia para magsoldado, nagpangabay sia nga maghimo na lang sing alternative civilian service. Gin-asayn sia nga magtrabaho sa isa ka nursing home. Napangasawa niya si Kristina sang 2012. Nagtuon sila nga duha sing English kag Chinese para mabantalaan pa gid ang mas madamo nga tawo

Sang una nga mga binulan sang 2018, sekreto nga ginbutangan sang mga agent sang gobierno ang balay ni Brother Golik sang mga audio kag video surveillance equipment. Sang Hunyo 2018, gin-raid sang mga agent sang Federal Security Service (FSB) ang pito ka balay sang mga Saksi ni Jehova sa Blagoveshchensk. Bangod sini, ginpasakaan sing kaso si Brother Dmitriy Golik kag si Brother Aleksey Berchuk. Gin-akusahan sila nga nagaorganisar sang hilikuton sang extremist kuno nga organisasyon.

Wala dayon ginpabalo si Aleksey sang kaso sa iya. Sang Enero 21, 2019, gin-aresto sia sa passport control sa Domodedovo Moscow Airport. Gin-updan sia sang isa ka imbestigador sang FSB pauli sa iya siudad kag gindumilian sia nga magbiyahe sa iban nga lugar.

Nagsiling ining duha ka brother nga importante gid ang paghanda sing abanse sa mga paghingabot. Si Dmitriy nagsiling nga, “Maayo gid nga maglaum nga masimba si Jehova sing hilway, pero dapat man maghanda sa mga paghingabot.” Nagsiling pa sia: “Siempre, nakabulig gid sa akon nga handa ako nga hingabuton. Pero ang pinakamaayo nga paghanda nga nahimo ko amo ang pagpabakod sang akon relasyon kay Jehova. Kon hingabuton kita, indi importante kon daw ano kita kasagad manago sa mga magahingabot sa aton, kundi ang aton katutom sa Dios. Puede man kuntani nga nanago si Jesus sa iya mga kaaway, pero wala ina ginhimo ni Jesus. Bilang iya mga disipulo, wala man kita nagalikaw sa mga kabudlayan, kundi maisog naton nga ginabatas ang mga kabudlayan.”

Nagsiling pa si Aleksey: “Indi gid husto nga pamensaron naton nga, ‘Indi na ’ya matabo sa akon.’ Maathag nga ginatugutan ni Jehova nga matabo ini. Kon nakondisyon mo na ang imo kaugalingon nga sa ulihi hingabuton ka man kag nakahanda ka na, indi ka na mabudlayan nga batunon ini kag batason kon ara na kay nagasalig ka nga buligan ka ni Jehova.”

Bal-an naton nga ang mga kauturan sa Russia, pati na si Aleksey, si Dmitriy, kag ang ila mga asawa, magaugyon gid sa ginsiling sang salmista: “Ang Dios amo ang akon bulig; si Jehova upod sa mga nagapangapin sa akon.”—Salmo 54:3, 4.