Sa Oktubre 23, 2020, * ipahibalo sang Oktyabrsky District Court sang Kirov ang desisyon sini sa kaso ni Brother Anatoliy Tokarev. Mahimo sia prisuhon sing tatlo ka tuig kag tunga.

Anatoliy Tokarev

• Natawo: 1958 (Baranovskaya, Kirov Region)

• Biograpiya: Ginpadaku sia sang iya nanay. Nag-obra sia bilang software engineer kag retirado na subong. Mahilig sia sa photography kag nanamian man sia maghampang sing chess kag magtokar sang accordion. Ginpangasawa niya si Margarita sang 1979. May duha sila ka bata

• Bangod sang iya natun-an sa science, nangin atiesta sia. Sang 27 anyos sia, nagtuon sia sing Biblia sa upod sa mga Saksi ni Jehova kag narealisar niya nga nagasanto sa science ang ginatudlo sang Biblia

Sang Mayo 24, 2019, gin-raid sang mga agent sang Center for Countering Extremism sang Russia ang apartment sang pamilya Tokarev. Gin-interogar sang mga agent si Brother Tokarev. Ginpahog sia nga pasakaan sing kaso ang ila pamilya kon indi niya pag-akuon nga nagahimo sia sang “extremist” nga hilikuton. Dayon, gindala nila si Brother Tokarev sa ila opisina para kuestyunon.

Pagligad sang halos lima ka bulan, si Brother Tokarev ginpasakaan sing kaso kriminal base sa duha ka artikulo sang Criminal Code sang Russian Federation. Gin-akusar sia nga nagasuporta sa pinansial sa isa ka “extremist” nga organisasyon. Gingamit man sang mga nagasumbong sa iya ang audio recording nga sekreto nga ginrekord sa apartment sang pamilya Tokarev, para suportahan ang ila akusasyon nga si Anatoliy nag-organisar sang mga miting para tun-an ang ginadumilian nga “extremist” nga mga literatura.

Ginapangamuyo naton si Brother Tokarev kag ang iya pamilya. Nagasalig kita nga si Jehova padayon nga ‘magaunong’ sa ila.—Salmo 18:25.