Sang Septiembre 27, 2021, ang Leninskiy District Court of Ufa nagdesisyon nga guilty si Anatoliy kag ginsentensiahan sia sing duha ka tuig nga suspended prison.

Anatoliy Vilitkevich

• Natawo: 1986 (Khabarovsk Territory)

• Biograpiya: Nagatrabaho sia bilang panday kag eksperto sia sa finish carpentry. Napangasawa niya si Alyona sang 2008. Mahilig sila mag-camping kag mag-hiking

  Bata pa lang sia, gintudluan na sia sang iya mga ginikanan nga higugmaon ang Manunuga. Nanamian gid sia sa promisa sang Dios nga sa ulihi may paghidait na ang mga tawo kag mga sapat. Nabawtismuhan sia sang 1997 sang 11 anyos sia

Sang Agosto 8, 2018, ginlakip si Brother Anatoliy Vilitkevich sa listahan sang mga ginasuspetsahan nga isa ka terorista sa Russia. Duha sila ni Brother Dennis Christensen ang una sa mga Saksi nga ginbutang sa pretrial detention center, pagkatapos sang desisyon sang Supreme Court of the Russian Federation sang Abril 2017 nga i-ban ang mga Saksi ni Jehova.

Wala kabalo sanday Anatoliy kag Alyona nga ginbutangan sang kamera sang mga imbestigador ang ila apartment. Nakuha sa kamera nga si Anatoliy nakahimo sing “krimen” kay nagdumala sia sing pagbinagbinag sa Biblia upod sa iya mga abyan. Gin-akusar sia nga nagaorganisar sang mga hilikuton sang isa kuno ka extremist nga organisasyon.

Sang gindala sang mga pulis si Anatoliy, ginsilingan sang isa ka pulis si Alyona nga “mangita na sang bag-o nga bana.” Nagsiling si Anatoliy nga sang ginainterogar sia, “grabe gid ang iya stress. Ginsilingan nila ako nga kon indi ko pag-akuon ang mga kaso nga ginpasaka sa akon, madalahig gid ang akon asawa kag ang tanan nga nagtambong sa miting sa amon balay. Pirme nila ako ginasilingan nga mapriso man kuno ang akon asawa. Gani, nangamuyo ako kay Jehova nga buligan niya ako nga mangin malinong ang akon hunahuna.”

Sobra duha ka bulan nga ara sa pretrial detention si Anatoliy, halos siam ka bulan sia nga naka-house arrest, kag sobra isa ka tuig kag tunga nga gindumilian sa pagbiyahe. Sang ara sia sa prisuhan, ginsulat niya sa isa ka notebook ang halimbawa sang mga karakter sa Biblia nga ginhingabot man. Nagsiling sia: “Nadumduman ko nga wala ginkuha ni Jehova ang ila mga kabudlayan, pero wala man niya sila ginpabay-an. Nagpabakod ini sa akon kag nagpasalig nga indi man ako pagpabay-an ni Jehova. Ang importante sa akon amo nga dapat ako magpabilin nga mainunungon sa iya.” Ang mga sulat sang iya asawa nagpalig-on man sa iya. “Sa isa sang iya mga sulat, ginpadal-an ako ni Alyona sang mga piktyur namon upod sa amon mga abyan kag mga pamilya,” siling ni Anatoliy. “Ginatan-aw ko ini nga mga piktyur kada gab-i. Ginapamensar ko ang manami nga eksperiensia namon sang tawo nga upod ko sa piktyur. Gani, pamatyag ko daw ara lang sila sa tupad ko.”

Napalig-on gid kita sa katutom nanday Anatoliy kag Alyona. Nalipay gid kita kay bisan pa grabe ang paghingabot sa aton mga kauturan sa Russia, padayon sila gihapon nga nagaalagad kay Jehova. Kag nagapasalamat gid kita kay Jehova kay ginapamatian niya ang tanan naton nga pangamuyo para sa aton mga kauturan sa Russia.—2 Corinto 1:11.