Sang Pebrero 22, 2023, si Brother Andrey Andreyev ginpagua sa prisuhan sa Russia pagkatapos sang sobra tatlo ka tuig nga pagkapriso.

Gin-aresto si Andrey upod ang iban pa nga mga brother pagkatapos sang ginhimo nga pagpang-raid kag pag-interogar sang mga awtoridad sa madamo nga Saksi ni Jehova sa Kursk sang Oktubre 16, 2019. Halos 20 ka bulan sia sa pretrial detention samtang nagahulat sang pag-hearing sa iya. Ginsentensiahan sia nga mapriso sang Hunyo 3, 2021.

Bisan pa napriso sia bangod sang iya pagtuo, ginhimo ni Andrey ang bug-os niya nga masarangan para buligan nga mapabakod ang pagtuo sang iya asawa nga si Svetlana, kag sang ila duha ka bata nga babayi nga sanday Anzhelika kag Albina. Sa iya mga sulat, pirme niya sila ginapalig-on paagi sa mga teksto sa Biblia kag ginsulat pa gani niya ang pamulongpulong para sa kasal ni Anzhelika, nga ginkasal samtang napriso sia. Si Anzhelika nagsiling: “Kanami gid sang ginsulat niya nga pamulongpulong. Natandog gid sini ang tagipusuon sang tanan namon nga bisita . . . kag nagbatyag kami nga daw kaupod namon sia sina nga adlaw.”

Para mabisitahan si Andrey, kinahanglan magbiyahe sing walo ka oras pakadto pa lang sang iya pamilya. Bisan pa makakalapoy ini, si Svetlana nagsiling nga ginasuportahan gid sila sang mga kauturan didto. Ginapadayon nila sila sa ila mga balay, ginapakaon, kag nagaamot para sa ila plete pakadto kag pabalik sa detention center. Ang iban gani nagapila sa visitation line, sa masami sa bilog nga gab-i, para lang mabisitahan si Andrey sang iya pamilya.

Bisan pa nagaantos sa pisikal si Andrey bangod indi maayo ang pagtrato sa iya sa prisuhan, ang pagtuo ni Andrey mabakod gihapon. Bangod sang iya maayo nga paggawi kag Cristiano nga personalidad, gintahod gid sia sang mga awtoridad sa prisuhan kag ginpasugtan sia nga makabaton sang madamo nga bisita. Si Andrey nagsiling parte sa iya pagkapriso: “Wala gid ako sang kaugot, kaakig, kag dumot sa kay bisan sin-o. Sa bulig ni Jehova nakapabilin ako nga matutom kag malipayon gid ako.”

Nagasalig kita nga padayon nga padyaan ni Jehova sing bugana ang determinasyon ni Andrey nga magpakita sang Cristianong gugma.—1 Juan 4:16.