Sang Septiembre 9, 2021, nagdesisyon ang Birobidzhan District Court of the Jewish Autonomous Region nga guilty si Brother Andrey Gubin kag ginsentensiahan sia nga mapriso sing duha ka tuig kag anom ka bulan. Indi niya kinahanglan nga mapriso sa sini nga tion.

Andrey Gubin

• Natawo: 1974 (Saran City, Kazakhstan)

• Biograpiya: May magulang sia nga lalaki kag babayi. Sang bata pa sia, pagkatapos sang iya klase nagatrabaho sia sing part-time para masuportahan ang iya pamilya. Ginatudluan sia kon paano maghimo kag magkay-o sang mga kandado. Sang ulihi, nangin manugturno sia kag nangin operator sang heavy-equipment. Mahilig sia maghampang sing sports, magsulat sing binalaybay, kag magtokar sang mga instrumento sa musika

• Sang bata pa sia, nagalalain gid sia sa inhustisya kag kalainan nga nagakatabo sa kalibutan. Naumpawan gid sia sang nagtuon sia sang Biblia kay nabal-an niya nga may pulos gali ang iya kabuhi. Nanamian gid sia sa promisa sang Biblia nga magaabot ang tion nga may hustisya na kag paghidait. Amo ini ang rason kon ngaa nagdedikar sia sang iya kabuhi kay Jehova nga Dios. Nabawtismuhan sia sang 1991 sang 17 anyos sia. Napangasawa niya si Tatyana sang 2007. Nagsaylo sila sa Birobidzhan sang 2011

Sang Pebrero 12, 2020, gin-imbestigahan sang mga agent sang Federal Security Service (FSB) si Brother Andrey Gubin. Sang Septiembre 17, 2020, ginsugdan ang pag-hearing sa iya kaso.

Ang iya kaso isa sa 19 ka kaso kriminal nga ginpasaka sa aton mga kauturan sa Jewish Autonomous Region. Ginkasuhan sila sa tapos sang sunodsunod nga pagpang-raid sa madamo nga balay. Ini nga pagpang-raid gintawag nga “Adlaw sang Paghukom.” Sang Mayo 17, 2018, gin-raid sang 150 ka pulis ang 22 ka balay sang mga Saksi ni Jehova. Ginkompiskar sang mga pulis ang ila mga bank card, kuarta, piktyur, kompyuter, kag mga gadyet.

Gin-freeze man sang mga awtoridad ang mga bank account nanday Andrey kag Tatyana. Bangod sini, nabudlayan gid sila mangita sing kuarta para sa ila mga kinahanglanon. Nagluya man ang panglawas ni Tatyana bangod sa sini nga kaso nga naglawig sing binulan. Pero pirme gid sila nga mag-asawa nagabasa sing Biblia kag nakapaumpaw gid ini sa ila. Nakabulig gid sa ila ang praktikal nga mga laygay sang Biblia kon paano nila mabatas ang mabudlay katama nga sitwasyon.

Ginsuportahan gid sang mga kauturan si Andrey. Bangod sini, mas nagsalig pa gid sia kay Jehova kag sa Iya organisasyon. Halimbawa, nabalaka gid si Andrey sa iya sitwasyon. Ginsugid niya ini sa isa ka brother nga ginkasuhan man. Ginpasalig sang brother si Andrey nga normal lang nga magkabalaka sa iya sitwasyon. Dayon, ginpahanumdom sang brother kay Andrey ang parte kay Jesus. Nagsiling sia nga para kay Jesus isa ka pribilehiyo nga hingabuton sa ngalan ni Jehova. “Pagkatapos ’ya ’to mahambal, nagtawhay ang akon hunahuna,” siling ni Andrey. “Determinado ako nga padayon nga himuon ang kabubut-on sang aton Amay.”

Ginapangamuyo gid naton sanday Andrey kag Tatyana. Kabay nga padayon sila nga mapaumpawan paagi sa pagsalig sa Pulong sang Dios kag sa pagsuporta sang aton mga kauturan. Nagasalig gid kita nga “maayo ang madangatan sang mga nagakahadlok sa matuod nga Dios.”—Manugwali 8:12.