Sang Hunyo 3, 2021, nagdesisyon ang Zheleznodorozhny District Court of Krasnoyarsk nga guilty si Brother Andrey Stupnikov kag ginsentensiahan sia nga mapriso sing anom ka tuig. Halin sa korte, diretso sia nga gindala sa prisuhan.

Andrey Stupnikov

• Natawo: 1973 (Norilsk, Krasnoyarsk Territory)

• Biograpiya: Isa sia ka oil and gas drilling engineer. Napangasawa niya si Olga sang 1993. Nanamian sia sa arts kag maglagaw sa gua para mag-enjoy sang palibot

  Halin sang pamatan-on pa sia, gusto na niya nga makilala ang Dios. Sang nag-istar sila sa Chechnya, nasaksihan niya ang grabe nga pagpamintas sang natabo ang una nga Chechen War. Ginpalibugan niya kon ngaa nagakatabo ang malain nga mga butang kag kon ano ang iya himuon para proteksionan sia sang Dios. Nagtuon sila ni Olga sing Biblia upod sa mga Saksi ni Jehova. Nagdayaw gid sila sang matun-an nila kon paano nagakatuman ang mga tagna sa Biblia. Nanamian man sila sa mga laygay sang Biblia sa pag-atubang sa mga problema

Sang Hulyo 3, 2018, gin-aresto sang mga agent sang Federal Security Service (FSB) si Brother Andrey Stupnikov sa Krasnoyarsk International Airport. Sia ang una nga Saksi nga ginkasuhan sa Krasnoyarsk. Pagkasunod nga adlaw, nagmando ang Zheleznodorozhny District Court of Krasnoyarsk nga ibutang si Andrey sa pretrial detention.

Ang asawa ni Andrey nga si Olga pirme nagapadala sang mga sulat sa iya para mapalig-on sia. Pero natingala si Andrey kay gulpi lang nga wala na sia nakabaton sing mga sulat halin sa iya asawa. Dayon may natabo nga nagpadugang pa gid sang iya kabalaka. Si Andrey nagsiling: “May isa ka tawo nga namangkot sa akon: ‘Ti, ano natabo sa imo asawa? Bal-an mo?’” Sang ulihi, naabot ni Andrey nga hungod nga wala ginahatag sang administrasyon sang prisuhan ang mga sulat sang iya asawa. Si Andrey nagsiling: “Hambal nila makapuli ko dayon sa akon asawa kon magkooperar ako ukon kon akuon ko ang tanan nga akusasyon batok sa akon.” Nagsalig gid si Andrey kay Jehova kag padayon nga nangin matutom. Pagkatapos sang walo ka bulan sa pretrial detention, apat ka bulan sia nga gin-house arrest.

Sang Hulyo 2, 2019, gintapos ang pag-house arrest kay Andrey. Pero wala sia ginpasugtan nga magpadala ukon magbaton sang mga e-mail, kag indi man sia makagamit sing Internet. Ginaestriktuhan man sang awtoridad kon sin-o lang ang puede niya maistorya.

Samtang nagapadayon ang pag-hearing sa iya mga kaso, pirme gid ginadumdom ni Andrey ang iya dedikasyon kay Jehova. Nagsiling sia: “Proud gid ’ko nga nakilala ko si Jehova, kag wala gid niya ako ginpabay-an.”

Mabakod gid ang iya pagsalig sa bulig ni Jehova. Ginapasalamatan gid naton ang maayo nga halimbawa ni Andrey.—Salmo 28:7.