Si Andrzej Oniszczuk, nga isa ka citizen sang Poland kag pinalangga naton nga utod, ginpriso sa Russia bisan wala pa sia mabista sugod sang gin-aresto sia sang mga pulis kag mga soldado sang militar sang Oktubre 9, 2018. Sining karon lang, ginpalawig liwat sa ikalima na nga beses ang pagpriso sa iya. Ang iya bag-o nga termino nakaiskedyul nga matapos sa Oktubre 2, nga malapit na isa ka tuig sugod sang ginpriso sia.

Si Andrzej ginbutang sa bartolina sugod sang ginpriso sia. Halin sa 6:00 a.m. asta 9:00 p.m., wala sia ginatugutan nga maghigda. Ginatugutan sia nga magpaligo sa mainit nga tubig isa lang ka bes kada semana, sa sulod lang sang 15 minutos. Ang asawa ni Andrzej nga si Anna wala gid gintugutan nga bisitahan sia sa sulod na sang napulo ka bulan nga ara sia sa prisuhan. Nagakomunikar lang sila paagi sa sulat. Pila ka beses na sia nga nagpadala sing pangabay nga mabisita si Andrzej, pero wala gid sia ginpasugtan.

Suno sa nareport na sang nagligad, si Andrzej gin-aresto sang mga pulis kag ginhalughog sang mga soldado sang militar nga may tabon ang nawong ang ila balay kag ang 18 pa ka iban nga balay sa Kirov. Ginpasakaan si Andrzej sang kaso kriminal bangod sa pagkanta sang mga ambahanon sang Ginharian kag pagtuon sang mga literatura parte sa relihion.

Luwas kay Andrzej, may apat pa ka brother halin sa Kirov (ang 44 anyos nga si Maksim Khalturin, ang 66 anyos nga si Vladimir Korobeynikov, ang 26 anyos nga si Andrey Suvorkov, kag ang 41 anyos nga si Evgeniy Suvorkov) ang gin-aresto sang nagligad nga tuig kag ginpriso bisan wala pa mabista. Kag sugod sadto, gin-house arrest na sila. Ang kaso ni Andrzej upod sa kaso sining apat ka brother, naka-pending na sa European Court of Human Rights.

Sini nga tuig, ang mga awtoridad sang Russia nagpasaka sing kaso sa pito pa ka brother sa Kirov—ang pinakatigulang sa ila amo ang 70 anyos nga si Yevgeniy Udintsev. Sa kabilugan, 12 na tanan ka Saksi ni Jehova sa Kirov ang ginpasakaan sing kaso kriminal bangod sa paghimo sang mga hilikuton sang ila relihion.

Parte kay Andrzej, kay Anna, kag sa iban pa nga pinalangga naton nga kauturan sa Russia, kabay nga indi naton pagkalimtan ang pahanumdom sang Pulong sang Dios: “Dumduma ninyo ang mga yara sa bilangguan, nga daw subong nga nabilanggo man kamo upod sa ila, kag ang mga ginapintasan, sanglit kamo pareho man sa ila nga yara sa undanon nga lawas.”—Hebreo 13:3.