Sa Pebrero 2, 2021, a ipahibalo sang Birobidzhan District Court of the Jewish Autonomous Region ang desisyon sini sa kaso ni Brother Artur Lokhvitskiy. Mahimo sia mapriso sing apat ka tuig.

Artur Lokhvitskiy

• Natawo: 1986 (Belgorodskoye, Jewish Autonomous Region)

• Biograpiya: Sang pito pa lang ka tuig si Artur, napatay ang iya amay. Nangin electrician sia kag eksperto sia sa fire protection. Nakabaton sia sang mga award bangod sa iya kapisan sa trabaho

  Bata pa si Artur sang gintudluan sia sang iya iloy nga palanggaon si Jehova. Sang 1998, nabawtismuhan sia bilang isa sa mga Saksi ni Jehova sang 11 anyos pa lang sia. Napangasawa niya si Anna sang 2018. Nanamian sila magbiyahe kag maglagawlagaw

Sang Mayo 2018, tatlo pa lang ka bulan sa tapos ginkasal si Artur kag si Anna, ginhalughog sang mga agent ang ila balay. Ini nga pag-raid nalakip sa operasyon sang mga awtoridad nga gintawag nila nga “Adlaw sang Paghukom.” Sa sini nga pag-raid, ginhalughog sang 150 ka agent ang indi magnubo sa siam ka balay sang mga Saksi ni Jehova. Ginhalughog man ang balay sang iloy ni Artur nga si Irina. Sang Hulyo 31, 2019, ginkasuhan si Artur sang mga agent sang Federal Security Service (FSB) sa Birobidzhan bangod nagpakigbahin sia kuno sa extremist nga hilikuton. Ginkasuhan man si Anna kag si Irina.

Ang kaso nga ginpasaka sa ila pamilya nagpabudlay gid sa ila kabuhi. Nagmando ang awtoridad nga indi puede magkuha si Artur sang iya kuarta sa banko. Ginpahog man sia sang iya amo nga pahalinon sia sa obra.

Bangod sa padayon nga pag-imbestigar sa ila kaso, indi na makapangabuhi sing normal ang ila pamilya. Si Artur nagsiling: “Nagbag-o gid ang amon kabuhi. Indi na kami makahimo sing plano para sa himuon namon sa isa ka semana (ukon bisan gani sa isa lang ka adlaw). Ginatawgan kami [sang mga pulis] sa bisan ano oras nga gusto nila. Gani, kinahanglan namon nga i-adjust pirme ang amon iskedyul.”

Nagapasalamat gid si Artur kag si Anna sa bulig sang mga kauturan. Si Artur nagsiling: “Ginpalig-on gid kami sang mga kauturan kag ginbuligan nila kami nga mangin kalmado kag magpabilin nga suod kay Jehova. . . . Nalipay gid kami kay ara ang mga kauturan nga nagasuporta sa amon. Para sa amon, isa gid ka kadungganan nga pangapinan ang ngalan ni Jehova sa korte! Nabatyagan namon nga wala gid ginapabay-an ni Jehova ang mga ginapanag-iyahan niya!”

Ang pagpangamuyo kag pagtuon sa Biblia nakabulig man sa mag-asawa nga Lokhvitskiy nga mangin mabakod kag maisog. Pero, indi ini mahapos. Pagkatapos sang pagpang-raid nga gintawag “Adlaw sang Paghukom,” siling ni Artur, “Wala na gid kami sing Biblia ukon sing bisan ano nga literatura nga base sa Biblia.” Sang primero, nabalaka gid si Artur. Nagapalibog sia kon paano nila mapadayon sang iya pamilya ang pagtuon sang Biblia. Pero nadumduman niya ang isa ka importante nga kamatuoran: “Indi kita mapunggan [sang FSB] nga makapangamuyo. Nangamuyo kami dayon kag amo gid ini ang nakabulig sa amon.”

Ginsabat dayon ni Jehova ang ila mga pangamuyo kag nakatigayon sila sang espirituwal nga pagkaon nga kinahanglan nila para makapadayon sila sa pagtuon. Si Artur nagsiling: “Gintinguhaan gid namon nga mangin regular sa amon family worship, paghanda para sa mga miting, kag pagbasa sing Biblia bilang pamilya. Nakabulig ini sa amon nga mangin suod pa gid sa isa kag isa. Nabatyagan man namon nga ginabuligan kami sang Dios kag gani nakapabilin kami nga matutom.”

Magluwas sa pagbasa kag pagtuon sa Pulong sang Dios, nakabulig man sa ila ang pagpamalandong sa mga pagpakamaayo nga ila mabaton sa palaabuton. Si Artur nagsiling: “Pirme namon ginapamensar ang paglaum sa palaabuton kag ginaimadyin namon nga ara na kami sa bag-ong kalibutan.” Nagsiling pa sia: “Gusto gid namon magbulig sa pagtinlo sa duta kag sa konstruksion. Ang pagpamalandong sa sini nakabulig sa amon nga mangin mabakod kag indi mag-untat.”

Mientras wala pa ini, pirme ginadumdom ni Artur kag ni Anna ang Hebreo 13:6. Nagasiling ini: “Si Jehova ang akon manugbulig; indi ako magkahadlok. Ano ang mahimo sang tawo sa akon?” Si Artur nagsiling: “Puede kuhaon sang awtoridad ang amon kahilwayan, balabagan ang amon pagtipon, ukon bulagon kami nga mag-asawa. Pero indi gid nila makuha sa amon ang importante nga mga butang, nga amo ang amon suod nga kaangtanan kay Jehova, ang pangamuyo, kag ang amon paglaum sa palaabuton. Indi gid namon ina pagkalimtan.”