Sang Hulyo 15, 2020, si Brother Dennis Christensen ginbutang liwat sa selda nga para sa mga priso nga ginasilutan (SHIZO). Magatener sia didto asta sa Hulyo 27 ukon mas malawig pa. Apat ka adlaw pa lang ang nagligad sugod sang ginbalik sia sa regular nga selda, pero ginbutang naman sia liwat sa SHIZO. Kon matabo pa gid ini sa ikatlo nga tion, mahimo ideklarar sia nga “hungod nga nagalapas sa mando sang prisuhan” kag ibutang sia sa selda nga para sa mga priso nga dapat silutan sing mas mabug-at (EPKT) asta sa anom ka bulan. Iapelar sang mga abogado ni Brother Christensen ining bag-o nga mga panumbungon.

Ginasilutan sang mga awtoridad si Brother Christensen bangod indi niya masarangan nga mahimo ang iya asaynment sa prisuhan. Ang mga awtoridad sang prisuhan nagmando nga mag-obra si Brother Christensen sa talahian sang prisuhan. Nagmasakit sia sa prisuhan kag indi pa maayo ang iya pamatyag pero ang mga doktor sa prisuhan nagsiling nga masarangan ini ni Brother Christensen, basta pasugtan sia nga mag-break para makapahuway sia kag makaehersisyo. Pero sang gin-eksamin sia sadto sang isa pa ka doktor nga wala nagaobra sa prisuhan, nagsiling ini nga indi mahimo ni Brother Christensen ang obra nga gin-asayn sa iya bangod sang iya kondisyon.

Sa SHIZO, wala ginatugutan ang mga priso nga makabakal sang ila pagkaon, makagamit sang telepono, mabisitahan, ukon makabaton sang mga padala. Pero ginatugutan sang kasuguan nga mabisitahan sila sang mga ministro sang ila relihion. Galing indi mabisitahan sang mga gulang si Brother Christensen bangod ang mga Saksi ni Jehova indi na rehistrado nga relihion sa Russia.

Suno sa nareport na, sang Hunyo 23, nagdesisyon ang Lgov District Court nga multahan na lang si Brother Christensen para makagua sia sa prisuhan sing temprano. Pagligad sang pila lang ka adlaw, gin-apelar sang piskal ina nga desisyon. Nagagua nga ang mga opisyal sang prisuhan kag ang piskal nagakunsabuhay para gub-on ang reputasyon ni Brother Christensen kag punggan ang temprano nga pagpagua sa iya.

Si Brother Christensen kag ang iya asawa nga si Irina positibo gihapon. Napalig-on gid kita nga makita kon paano ginabuligan pirme ni Jehova ang iya matutom nga mga alagad nga mabatas ang pinakamabudlay nga mga pagtilaw nga may pagpailob kag kalipay.—Colosas 1:11.