Sang Hunyo 2, 2021, nagdesisyon ang Minusinsk City Court sang Krasnoyarsk Territory nga guilty si Brother Dmitriy Maslov. Ginmultahan sia sing 450,000 rubles ($6,125 U.S.).

Dmitriy Maslov

• Natawo: 1976 (Minusinsk)

• Biograpiya: Nagasolo lang ang iya iloy sa pagpadaku sa iya kag sa iya duha ka manghod, isa ka lalaki kag isa ka babayi. Naggradweyt sia sa isa ka vocational school kag may degree sia sa beekeeping. Sining karon lang nagtrabaho sia bilang isa ka plumber. Nanamian sia mag-bike, mag-scuba diving, kag magtokar sing accordion

  Sang bata sia, ginapaligban niya ang importante nga mga pamangkot parte sa kabuhi. Nakita niya ang maathag kag makapakumbinsi nga sabat sa Biblia. Nabawtismuhan sia sang 1994. Sang ginpatawag sia nga magsoldado, nangindi sia bangod sa iya konsiensia kag nagpangabay na lang nga maghimo sing civilian service. Napangasawa niya si Yuliya sang 1997

Sang gab-i sang Abril 19, 2019, gin-raid sang mga soldado kag sang mga miembro sang Investigative Committee kag sang Federal Security Service (FSB) ang lima ka balay sang mga Saksi ni Jehova sa Minusinsk. Sa tion sang raid, gintiklod ang 76 anyos nga brother amo nga natumba sia kag nasamaran. Sobra 30 ka kauturan ang gin-detain kag gin-interogar, pero ginbuy-an man pagkatapos. Sang ulihi, ginpasakaan sing kaso kriminal si Dmitriy. Ang panguna niya nga “sala” amo ang pag-organisar sang hiking sa bukid upod sa iya mga abyan kay sa sini kuno nga tion ginaistoryahan nila ang parte sa Dios kag sa Biblia.

Gindumilian subong si Dmitriy nga magbiyahe samtang ginahulat ang desisyon sang iya kaso. Para sa iya iloy nga indi pareho sa iya sang ginapatihan, indi gid makatarunganon ang pagpasaka sing kaso sa iya bata kag indi gid nagakabagay nga kabigon sia nga kriminal. Nagapati sia nga ang relihion sang iya bata amo ang “pinakamalinong nga relihion.”

Napaumpawan gid si Dmitriy kag napabakod bangod kabalo sia nga ‘ipakita ni Jehova ang iya kusog’ para sa mga matutom sa iya.—2 Cronica 16:9.