Sang Disembre 31, 2020, ginpagua na sa prisuhan sa Russia si Brother Feliks Makhammadiyev. Ang Belyayevsky District Court sang Orenburg Region nagdesisyon nga ibutang sia anay sa deportation center asta nga makompleto niya ang kinahanglanon nga mga dokumento para ma-deport sia sa iya pungsod sa Uzbekistan. Kinahanglan sia i-deport kay ginbawi na sang Russia ang iya citizenship sang Abril 2020. Sang Enero 20, 2021, ginpasakay sia sang mga awtoridad sa tren pakadto sa Uzbekistan. Nalipay kami nga ipahibalo nga si Feliks nakaabot na sa Uzbekistan sang Enero 21, 2021 kag maayo ang iya kahimtangan. Duha ka adlaw antes sia gin-deport, nagbiyahe na pa Uzbekistan ang iya asawa nga si Yevgeniya, gani ginsugat niya si Feliks pag-abot sini sa Uzbekistan.

Mga 18 ka tuig nga nag-istar si Feliks sa Russia. Sang 2002, sang tin-edyer pa lang sia, nagsaylo sila sang iya iloy sa Saratov sa Russia halin sa Uzbekistan. Sang 2004, nabawtismuhan sia sang 19 anyos sia. Sang 2011, ginpangasawa niya si Yevgeniya.

Sang Hunyo 12, 2018, gin-raid sang armado nga mga agent sang Federal Security Service (FSB) nga may tabon ang mga guya kag sang mga pulis ang balay ni Feliks kag ni Yevgeniya. Gin-aresto nila si Feliks kag ginbutang sia sa pretrial detention sing halos isa ka tuig. Nakabulig sa iya ang pangamuyo kay siling niya: “Kada adlaw ako nagapangamuyo kay Jehova nga hatagan niya ako sing kalinong kag kalipay sa sina nga adlaw.”

Sang Septiembre 19, 2019, si Feliks kag ang lima pa ka brother ginsentensiahan nga guilty kag dapat prisuhon. Napierde sila sa ila pag-apelar, gani si Feliks kag ang apat pa ka brother ginsaylo sa prisuhan sa Orenburg. Mga 800 kilometros ang kalayuon sini sa Saratov diin nagaistar ang ila mga pamilya. Sang nag-abot sila prisuhan, ginkastigo sila.

Bisan pa nga amo ini ang natabo sa ila, malipayon gihapon si Feliks kag pirme nagayuhum. Si Yevgeniya nagsiling: “Proud gid ’ko sa iya! Kalmado sia kag maisog sang nag-atubang sia sa korte kag asta subong maisog sia nga nagabatas, kag ginabuligan man niya ako nga makabatas.”

Gusto gid sang awtoridad sang Russia nga biyaan ni Feliks si Jehova gani ginpabudlayan gid nila sia. Pero nagsiling si Feliks nga imbes nga magluya ang iya pagtuo, ang iya malawig nga pagkapriso nagpabakod pa gid sang iya katutom kay Jehova. Nagapahanumdom ini sa aton sang rekord sa Genesis 50:20, diin ginsilingan ni Jose ang iya mga utod: “Bisan pa gintuyo ninyo nga halitan ako, gintuyo sang Dios nga mangin maayo ang resulta sini.”