Sa Hunyo 8, 2020, ipahibalo sang Pskov City Court ang desisyon sini sa kaso sang 61 anyos nga si Brother Gennady Shpakovskiy. Gin-akusar sia nga naghimo sang “extremist” nga hilikuton bangod lamang may ginhiwat sa iya balay nga gamay nga Cristianong pagtilipon. Nagpangabay sa korte ang piskal nga prisuhon si Brother Shpakovskiy sing pito ka tuig kag tunga.

Sugod sang una nga mga bulan sang 2018, sekreto nga ginpamatian sang mga agent sang Federal State Security (FSB) ang mga tawag sa telepono sa apartment nanday Brother Shpakovskiy kag ginbantayan ang ila mga hulag sa sulod sang pila ka bulan. Sang Hunyo 3, 2018, mahidaiton nga nagtipon sa ila apartment ang pila ka tawo para maghiwat sang miting. Sang alas 12:45 sang hapon sina nga adlaw, puersa nga ginbuksan sang mga agent sang FSB upod sa armado nga mga miembro sang National Guard ang mayor nga puertahan sang apartment, kag ginhalughog ini sing anom ka oras.

Ginkuha sang mga agent sang FSB ang mga tablet kag mga cellphone kag gindala ang mga Saksi para kuestyunon. Gin-insulto sang mga pulis ang mga Saksi kag ginpahog sila nga pahalinon sa obra kag pasakaan sang kaso kriminal. Ang pagkuestyon kay Brother Shpakovskiy naglawig asta alas 10:00 sang gab-i.

Sang Marso 19, 2019, gin-akusahan si Brother Shpakovskiy nga nagaorganisar sang mga hilikuton sang “extremist” nga organisasyon. Pagligad sang lima ka bulan, gin-akusahan pa gid sia nga “nagasuporta sa pinansial sa extremist nga mga hilikuton.”

Samtang ginahulat naton ang desisyon sang korte, nagasalig kita sing bug-os nga buligan ni Jehova ang pamilya Shpakovskiy nga magpabilin nga mabakod, kag kabalo kita nga ang ila matutom nga pagbatas pagapadyaan.—2 Cronica 15:7.