Sa Marso 31, 2020, ipahibalo sang Lensky District Court sang Republic of Sakha ang desisyon sini sa kaso ni Brother Igor Ivashin. Gusto sang piskal nga mapriso sia sing pito ka tuig.

Sang Pebrero 2018, ginsugtan sang Yakutsk City Court ang mga pulis nga pamatian ang mga tawag sa telepono ni Brother Ivashin. Pagligad sang pila ka bulan, gin-raid sang mga pulis ang walo ka balay sang mga Saksi, pati ang balay ni Brother Ivashin. Gindala sia kag ang 21 ka iban pa nga Saksi sa presinto kag gin-interogar. Ang piskal nagsiling nga ginaorganisar ni Brother Ivashin ang mga hilikuton sang isa ka “extremist” nga organisasyon.

Sang Nobiembre 20, 2019, ginbalik sa opisina sang piskal ang kaso bangod wala sing ebidensia batok kay Brother Ivashin. Gin-apelar ini sang piskal kag ginbalik ang kaso sa district court. Sang Pebrero 2020, ginsugdan ang pagbista sa kaso.

Si Brother Ivashin kag ang iya asawa nga si Natalia, may duha ka bata nga babayi. Samtang nagahilapit ang desisyon sa iya kaso, ginapangamuyo naton nga ang pamilya ni Brother Ivashin padayon nga ‘makabatas sing bug-os nga may pagpailob kag kalipay.’—Colosas 1:11.