Sa Pebrero 1, 2021, a ipahibalo sang Birobidzhan District Court of the Jewish Autonomous Region ang desisyon sini sa kaso ni Brother Igor Tsarev. Mahimo sia mapriso sing apat ka tuig.

Igor Tsarev

• Natawo: 1974 (Birakan, Jewish Autonomous Region)

• Biograpiya: May duha sia ka manghod nga babayi. Samtang nagaeskwela sia, nagtrabaho sia bilang logger, panday, kag electrician para masuportahan ang kinahanglanon sang ila pamilya. Nanamian sia maglagaw para apresyahon ang palibot kag mangisda

• Sang soldado pa sia, nagsugod sia sa pagpamangkot sa iya kaugalingon kon ngaa gintuga kita sang Dios. Amo ini ang rason kon ngaa nagtuon sia kag ang iya amay sing Biblia. Nabawtismuhan sia sang 1997. Napangasawa niya si Viktoriya sang 1998 kag may isa sila ka bata nga babayi nga nagaeskwela pa

Sang Hulyo 30, 2019, ginpasakaan sing kaso kriminal sang mga awtoridad sang Russia si Brother Igor Tsarev. Ginsumbong sia nga nagatuon sing Biblia “para ipalapnag ang panudlo sang mga Saksi ni Jehova.” May ginpagua nga ebidensia batok kay Igor, lakip sa sini ang mga video sang mga miting nga sekreto nga ginrekord sang mga agent sang Federal Security Service (FSB). Nagpangabay ang piskal nga indi pagpatambungon sa hearing ang mga tawo. Suno sa piskal, kinahanglan ini para indi mabatian sang mga tawo ang hearing kay basi makumbinsi sila ni Igor kag mangin Saksi ni Jehova man sila. Nagpasugot sa sini ang korte.

“Sa indi madugay, magabag-o gid ang akon kabuhi bangod sa desisyon sang korte,” siling ni Igor. “Ang matuod daku na ang ginbag-o sang akon kabuhi. Indi na ako makabiyahe sa mga lugar nga wala ginatugot sang awtoridad. Sa akon naman obra, kinahanglan ko ipaathag sa akon amo kon ngaa ginaimbestigahan ako sang mga pulis. Indi maintiendihan sang akon amo kag mga kaupod sa trabaho kon ngaa ginakasuhan ako, pero bal-an nila nga halin sang una ginahingabot gid ang mga Cristiano.”

Ginapangamuyo naton si Igor kag ang iya pamilya. Kabalo kita nga hatagan sila ni Jehova sang “gahom sang iya espiritu.”—Efeso 3:16.