Si Brother Konstantin Bazhenov ginpagua sa prisuhan sa Russia sang Mayo 5, 2021. a Pagkatapos sang pila ka adlaw sa temporary detention, gin-deport sia sa Ukraine sang Mayo 19, 2021. Ang iya asawa nga si Irina, nag-una na para may magsugat sa iya pag-abot niya. Gin-deport si Konstantin bangod gin-cancel sang Russia ang iya citizenship sang Mayo 2020.

Si Konstantin natawo sang 1975 sa Veliky Novgorod, nga isa ka siudad sa nakatundan sang Russia. Indi relihioso ang ila pamilya. Sang bata pa sia, nagsaylo ang ila pamilya sa Ukraine. Nagtuon sia sing gymnastics sang pamatan-on sia kag mahilig man sia sa music. Naggradweyt sia sa isa ka music school kag nangin lider sang isa ka banda.

Antes pa makatuon sing Biblia si Konstantin, nagapati na sia nga sala ang inaway kag kapintas. Gani, sang ginpatawag sia para mangin soldado sang Ukraine, nagpangindi sia. Sang nag-college na sia, madamo sia sing pamangkot parte sa kabuhi kag sa relihion. Madamo sia sing gin-usisa nga mga sekta sang relihion kag nakita niya ang sabat sa iya mga pamangkot sang nagtuon sia sing Biblia upod sa mga Saksi ni Jehova. Nabawtismuhan sia sang 1996.

Napangasawa ni Konstantin si Irina sang 2001. Para masuportahan ang iya kaugalingon kag si Irina, nag-obra sia bilang bricklayer, kag sagad sia maghimo sing mga pugon kag fireplace. Nagsaylo sila sa Russia sang 2009.

Sang Hunyo 12, 2018, gin-raid sang armado nga mga special force sang Russia ang pito ka balay sang mga Saksi ni Jehova sa Saratov, pati ang apartment ni Konstantin kag ni Irina. Dayon gin-aresto sia kag ang duha pa ka brother halin sa Saratov kag ginbutang sa pretrial detention.

Pag-abot niya sa detention center, kabalo gid si Konstantin nga mapabakod gid sia kag mapaumpawan sang Pulong sang Dios, pero wala sia sing Biblia. “Ginpadal-an ako sang notebook sang akon asawa, kag kada adlaw ginasulat ko ang mga bersikulo nga madumduman ko,” siling ni Konstantin. Ginbuligan sia ni Jehova nga madumduman ang 500 ka teksto sa sulod lang sang duha ka bulan! Sang ulihi, nakabaton sia sing Biblia kag naubos niya ini basa sa sulod lang sang apat ka bulan. Napalig-on gid sia sang Kasulatan. Ginapalig-on man niya ang iya asawa kag mga abyan paagi sa pagsambit sa iya mga sulat sa ila sang makapabakod nga mga punto nga iya nabasa sa Biblia.

Pirme gid si Konstantin nagapangamuyo sing hanuot kay Jehova nga mabatas niya ang pagpriso sa iya, ilabi na kon ginasubuan sia kag nahidlaw sa iya asawa. Nagsiling sia: “Nagaluhod ako. Dayon nagahilibion ako nga nagapangamuyo kay Jehova. Ginsulat ko man sa papel ang akon mga pangabay sa Dios kag ginmarkahan ko ang mga nasabat na niya. Kumbinsido gid ako nga malapit si Jehova sa akon.” Sang Mayo 20, 2019, ginpagua sia sa pretrial detention. Pero wala pa matapos ang iya mga kabudlayan.

Sang Septiembre 19, 2019, si Konstantin kag ang lima pa ka brother halin sa Saratov ginsentensiahan nga guilty kag ginpriso. Nag-apelar sila pero gin-deny ini pagligad sang pila ka bulan. Dayon, ang lima sa ila ginsaylo sa isa ka prisuhan sa Orenburg. Si Konstantin gindala sa isa ka prisuhan sa Dimitrovgrad, nga sobra 500 kilometros halin sa balay nila sang iya asawa sa Saratov.

Sang ginpriso si Konstantin, napalig-on gid si Irina sang iya mga nabasa sa JW News parte sa mga kauturan nga maisog kag malipayon nga nagbatas man sang mga paghingabot. Napabakod man si Irina sang determinasyon kag kalinong sang hunahuna ni Konstantin. Sang gin-interbyu si Irina samtang ara pa sa prisuhan si Konstantin, nagsiling sia: “Positibo gid sia pirme!” Kon pasugtan sia nga makatawag kay Konstantin, nagakanta sila, nagapangamuyo, kag nagatuon. Ang ila pag-istoryahanay parte sa Biblia nagpabakod gid sang pagtuo ni Irina kay Jehova kag nakabulig sa iya nga mangin malipayon bisan pa sang ila sitwasyon.

Masobra 14 ka bulan si Konstantin sa pretrial detention facility kag sobra isa ka tuig kag tunga sa prisuhan bangod sang iya pagtuo. Tatlo ka tuig kag tunga ang sentensia sa iya, pero mga siam ka bulan antes ini matapos, ginpagua na sia. Kay man, ginbuhin sa iya sentensia ang isa kag tunga ka pilo sang kalawigon nga gintener niya sa pretrial detention. Kag bangod ginparolan sia, wala na ginpatapos sa iya ang nabilin nga duha ka bulan sang iya sentensia.

Nalipay gid kita nga ginpagua na si Konstantin kag updanay na sila liwat ni Irina. Ginasunod gid sang tanan naton nga pinalangga nga kauturan nga nagabatas sang paghingabot ang ginsiling ni Hari David: “Nagapanago [ako] sa idalom sang imo mga pakpak tubtob magligad ang mga katalagman.”—Salmo 57:1.