Sa Septiembre 25, 2020, * ipahibalo sang Yelizovsky District Court sang Kamchatka Territory ang desisyon sini sa kaso ni Brother Konstantin Bazhenov kag sang iya asawa nga si Snezhana, kag ni Sister Vera Zolotova. Gusto sang piskal nga multahan sanday Brother Bazhenov kag Sister Bazhenov sing 600,000 rubles ($7,850 U.S.) kag si Sister Zolotova sing 400,000 rubles ($5,235 U.S.).

Konstantin Bazhenov

• Natawo: 1977 (Petropavlovsk-Kamchatsky, Kamchatka Territory)

• Biograpiya: Kamagulangan sa apat ka mag-utod. Nag-obra sia bilang mekaniko kag nagtudlo sa isa ka technical school. Nanamian sia magpangisda

• Sang 2001 ginpangasawa niya si Snezhana, nga isa ka maestra. May isa sila ka bata nga babayi nga si Elizabeth. Ang ila bilog nga pamilya nagaalagad kay Jehova

Snezhana Bazhenova

• Natawo: 1977 (Shikotan Island, Sakhalin Oblast)

• Biograpiya: Ginpadaku sia sang iya nagasolo nga ginikanan. Mapinalanggaon sia sa mga bata kag nanamian sia magtudlo sa mga bata sa primary-school. Pero subong, ginadumilian sia nga magtudlo sa mga bata bangod sa mga kaso kriminal nga ginpasaka sa iya

• Gintudluan sia sang iya lola parte sa Dios kag kon paano magpangamuyo. Bangod sini, nangin interesado sia nga tun-an ang mga butang parte sa Dios kag sa Biblia

Vera Zolotova

• Natawo: 1946 (Yelizovo, Kamchatka Territory)

• Biograpiya: Halin sia sa isa ka daku nga pamilya. Sang 1966, ginpamana niya si Yuri Zolotov. May duha sila ka bata. Isa sia ka retirado nga accountant. Nanamian sia mag-hike, mag-ski, kag mag-ice-skate

• Sa sulod sang mga tinuig, gusto gid niya nga makilala ang Dios, gani gin-usisa niya ang madamo nga relihion. Nalipay sia sang natun-an niya nga ang Dios wala sing ginapasulabi kag palangga Niya ang mga tawo. Ang iya bana indi isa sa mga Saksi ni Jehova. Pero, nagdayaw gid ang iya bana sa maayo nga epekto sang iya pagtuon sa Biblia sa iya kabuhi

Sang Agosto 19, 2018, gin-raid sang mga pulis ang tatlo ka balay sang mga Saksi sa banwa sang Yelizovo. Gin-aresto nila ang 11 ka kauturan kag inoras sila nga gin-interogar. Sang ulihi, walo sa ila ang ginpapauli. Pero, ginpasakaan sang mga awtoridad sing kaso kriminal si Brother Bazhenov, ang iya asawa, kag si Sister Zolotova. Ginbutang sila sa isa ka temporaryo nga detention facility. Pagligad sang duha ka adlaw, ginpapauli ang mga sister. Ang judge nagmando nga indi anay pagpaguaon si Brother Bazhenov. Ginpagua sia pagligad sang walo ka adlaw.

Samtang ginahulat nila ang desisyon sa ila kaso, ginapangamuyo naton nga ang mag-asawa nga Bazhenov kag si Sister Zolotova padayon nga magasalig sing bug-os kay Jehova. Ginapasalig kita sang Biblia nga si Jehova nagahatag sing kalipay kag paghidait sa iya mainunungon nga mga alagad, kag ‘magabakod ang ila paglaum paagi sa gahom sang balaan nga espiritu.’—Roma 15:13.