Sang Pebrero 18, 2021, ginsentensiahan sang Birobidzhan District Court of the Jewish Autonomous Region sang duha ka tuig kag tunga nga suspended prison sentence si Brother Konstantin Guzev. Indi sia kinahanglan nga mapriso sa sini nga tion.

Konstantin Guzev

• Natawo: 1964 (Khabarovsk)

• Biograpiya: Mapintas kag alcoholic ang iya tatay. Ginpalibugan niya kon ngaa gintuga kita sang Dios. Wala niya nakita ang sabat, gani naggamit sia sing drugs kag nangin palahubog. Sang ulihi, nakatuon sia sing Biblia upod sa mga Saksi ni Jehova kag nakita niya ang sabat sa iya mga pamangkot. Ginbag-o niya ang iya kabuhi. Nabawtismuhan sia sang tuig 2000. Sang 2001, napangasawa niya si Anastasiya

Nalakip ang balay ni Konstantin sa mga gin-raid sang awtoridad sang Mayo 2018. Nalakip ini sa operasyon nga ginatawag sang awtoridad nga “Adlaw sang Paghukom.” Sa sini nga pagpang-raid, ginhalughog sang 150 ka pulis ang mga balay sa siudad sang Birobidzhan. Sang Hulyo 29, 2019, ginpasakaan sang kaso sang mga awtoridad si Konstantin. Ginsumbong sia nga “nagaorganisar sang mga hilikuton sang isa ka extremist nga organisasyon” bangod lang nagdumala sia sang miting sang iya relihion.

Sa kabilugan, 19 ka kaso ang ginpasaka sa 22 ka Saksi ni Jehova sa sina nga lugar. Nalakip sa sini ang asawa ni Konstantin nga si Anastasiya.

Napabakod gid si Konstantin kag si Anastasiya sa halimbawa sang iban nga mga kauturan nga nagpakita sing kaisog. Si Konstantin nagsiling: “Nakita ko gid kag nabatian ang pila ka sister nga sang primero nagsiling nga kon mag-atubang na sila sa korte wala gid sila sing mahambal. . . . Pero sa bulig ni Jehova kag sa pangamuyo sang mga kauturan, nakahambal sila sing maayo kag napangapinan nila ang ila pagtuo.”

Ginapangamuyo gid naton ang aton mga kauturan sa Russia. Kabalo kita nga bisan ano pa ang himuon sang mga manughingabot para gub-on ang ila pagtuo kay Jehova, indi gid ini magmadinalag-on bangod kaupod nila si Jehova.—Isaias 8:10.