Sang Disiembre 18, 2020, ang Khostinskiy District Court sang Sochi nagdesisyon nga guilty si Brother Nikolay Kuzichkin kag Brother Vyacheslav Popov. Si Nikolay ginsentensiahan sang korte nga mapriso sing isa ka tuig kag isa ka bulan kag si Vyacheslav naman sing isa ka tuig kag pulo ka bulan. Pero bangod malawig na ang ila gintener sa pretrial detention, gindeklarar sang korte nga natapos na nila ang ila sentensia. Si Vyacheslav ara gihapon sa pretrial detention, pero paguaon sia gilayon kon mangin opisyal na ang desisyon. Gintapos naman ang pag-house arrest kay Nikolay.

Nikolay Kuzichkin

• Natawo: 1951 (Kostroma Region)

• Biograpiya: Sang makatapos sia sa music school, nag-obra sia bilang manugbagay sang piano. Sia kag ang iya asawa nga si Olga, may tatlo ka bata nga lalaki. Maayo man sia magsagod sang mga putyukan

  Nagtuon sia sing Biblia upod sa mga Saksi ni Jehova sa una nga mga tinuig sang dekada ’90. Nakita niya nga nagakatuman ang mga tagna sa Biblia gani nagdesisyon sia nga magdedikar kag magpabawtismo sang 1993

Vyacheslav Popov

• Natawo: 1974 (Tomsk)

• Biograpiya: Artist sia halin sang bata pa kag nangin interior designer sia sang ulihi. Nakilala niya ang iya asawa nga si Yuliya, sang nag-eskwela sila sa college. Nagpakasal sila sang 1998 kag may isa sila ka bata nga babayi kag duha ka bata nga lalaki. Nagsaylo sila sa Sochi sang 2010. Ang ila pamilya mahilig mag-ski kag magkadto sa baybay

  Si Yuliya ang una nga nagtuon sa Biblia upod sa mga Saksi ni Jehova. Sang mapatay ang tatay ni Vyacheslav, naumpawan gid sia sa mga kamatuoran sa Biblia. Nabawtismuhan sia sang 2004

Sang gab-i sang Oktubre 10, 2019, gin-raid sang pila ka grupo sang armado nga mga secret service officer, nga ang iban may mga ido, ang 36 ka balay sang mga Saksi ni Jehova sa Sochi, Russia.

Ginpahapa sila tanan sa salog, mga bata kag tigulang, samtang gina-raid ang ila mga balay. Ginpanguha ang ila mga cell phone, tablet, kompyuter, literatura, notebook, kag bisan mga postcard. Ang iban naman nga mga balay ginbutangan sang mga officer sang planted nga mga literatura. Pagkatapos sini, gin-aresto sang mga officer si Brother Nikolay Kuzichkin kag si Brother Vyacheslav Popov. Pagkasunod nga adlaw, ginbutang sila nga duha sa pretrial detention.

Si Brother Kuzichkin madamo sing ginabatyag sa iya lawas. Pila ka beses nga gin-deny sang korte ang iya pangabay nga magpadoktor, kay suno sa ila ang iya ginabatyag wala sa “listahan sang mga balatian nga puede mangin rason para indi pagprisuhon.” Naglala pa gid ang iya ginabatyag kay ginbutang si Nikolay sa selda nga punopuno sang mga priso nga nagapanigarilyo.

Bisan pa sa iya sitwasyon sa prisuhan nga mahimo magbutang sa iya kabuhi sa katalagman, si Nikolay nagsiling: “Ang prisuhan daw X-ray, kay kon mapriso ang isa ka Cristiano, makita gid ang iya matuod nga mga kinaiya, ukon kon ano nga mga kinaiya ang wala sa iya.” Imbes nga magpokus sa iya kaugalingon, nakilal-an si Nikolay sa prisuhan bilang mahidaiton kag mabuot nga tawo, nga nagatinguha gid nga buligan ang iban nga mga priso nga may depresyon kag nagapamensar nga maghikog.

Sang Abril 22, 2020, pagkatapos sang anom ka beses nga pagpalawig sang iya pagtener sa pretrial detention, gin-house arrest si Nikolay. Maluya na gid sia katama kag daw haluson na makatindog. Amo pa lang sia ginpasugtan nga magpadoktor.

Katorse ka beses naman nga ginpalawig ang pagtener ni Vyacheslav sa pretrial detention, gani sobra isa ka tuig sia nga napahilayo sa iya pamilya.

Ginapasalamatan gid naton si Nikolay kag si Vyacheslav sa ila maayo nga halimbawa sang pagtuo kag determinasyon nga suportahan ang pagkasoberano ni Jehova. Ginahimo gid nila ang ginasiling sang Salmo 16:8: “Ginahunahuna ko si Jehova sa tanan nga tion. Bangod yara sia sa akon tuo nga kamot, indi ako malingkang.”