Sang Disiembre 17, 2020, ang Leninskiy District Court sang Rostov-on-Don nagdesisyon nga guilty si Brother Ruslan Alyev kag ginpamatbatan sia sing duha ka tuig kag tunga nga suspended prison sentence. Indi sia kinahanglan nga prisuhon sa sini nga tion.

Sa mga inadlaw antes sang desisyon, nabatyagan gid ni Ruslan ang “paghidait sang Dios.” (Filipos 4:7) Kalmado niya nga ginsilingan ang iya mga abyan: “Wala ako nabalaka sa kon ano man ang mangin desisyon sang korte sa sini nga kaso. Kontrolado sang Dios ang tanan nga ginapasugtan niya nga matabo, kag buligan niya ako sa insakto gid nga tion. Alagaron ko si Jehova bisan diin man ako.” Siling niya “daku gid nga paumpaw” para sa iya, kay kabalo sia nga ginapangamuyo sang iya mga kauturan sa bilog nga kalibutan ang iya padayon nga pagbatas.

Sa iya katapusan nga komento sa korte sang Disiembre 14, 2020, si Ruslan may kaisog nga nagsiling: “Sang nagligad nga 2,000 ka tuig, isa ka 33 anyos nga tawo ang gin-akusar nga ginasulsulan niya ang mga tawo nga magrebelde sa gobierno. Pero base sa mga impormasyon nga nabal-an naton parte sa sini nga kaso, ginsentensiahan sia bangod sa iya kaangtanan sa Dios nga si Jehova. Ang mga testimonya sang mga saksi wala nagasinanto, kag indi mapamatud-an sang mga nagasumbong sa iya nga guilty sia. Pero ginsentensiahan sia gihapon nga guilty. Ina nga tawo amo si Jesucristo.

Subong, pagligad sang 2000 ka tuig, ako nga 33 anyos man, gin-akusar man sang krimen nga pagrebelde sa gobierno kag makatalagam para sa pungsod. . . . Sang nabal-an ko nga gin-akusar ako nga nagarebelde sa gobierno kag makatalagam ako para sa pungsod, daw indi ako makapati sa sining wala sing basihan kag binutig nga mga akusasyon.”

Mabaskog man nga ginpamatukan ni Ruslan ang sayop nga panumbungon nga ginasulsulan niya ang mga tawo nga sarisari ang tribo kag relihion nga magdumtanay. Nagsiling sia: “Bangod sa madamo nga rason, nagdaku ako sa tatlo ka kultura: Russian, Azerbaijani kag Ukrianian. Nanamian gid ako sa sini nga mga kultura. . . . Damu man ako sing abyan nga halin sa mga pungsod sa Africa nga nagahambal sing English, kag ang iban kabalo mag-Chinese. . . . Ako naman, ginbata sa Azerbaijan. Bal-an sang tanan nga madugay na nga nagadumtanay ang Azerbaijan kag Armenia, pero may suod ako nga amigo nga Armenian kag sia pa gani ang nagmaninoy sa akon kasal. Natun-an ko sa akon relihion nga palanggaon ko ang mga tawo nga sarisari ang nasyonalidad, rasa, relihion, kag kahimtangan sa pangabuhi. . . . Gani nakibot gid ako kag ang mga nakakilala sa akon sang gin-akusar ako nga ginapalig-on ko ang mga tawo, bangod sa ila rasa ukon tribo, nga magpensar nga superyor sila sangsa iban ukon ginasulsulan ko sila nga dumtan ang iban nga rasa.”

Makapalig-on gid mabal-an nga kada mag-atubang sa korte ang aton mga kauturan sa Russia, may kaisog nila nga ginagamit ini bilang mga kahigayunan nga makapanaksi. Nagasalig kita nga pakamaayuhon ni Jehova ang mga binhi sang kamatuoran nga aton ginatanom samtang ginapangapinan naton ang aton pagtuo sa atubangan sang mga opisyales.—Mateo 10:18.